Skafi italian mbytet në Zvërnec, shpëtojnë 4 turistët. Pronari fajëson shtetin shqiptar: Të penalizohet, s’ka hartë dixhitale detare!

Katër turistë italianë, mes tyre dhe një fëmijë, kanë shpëtuar mrekullisht mëngjesin e djeshëm, pasi skafi me të cilin po udhëtonin u përplas me disa shkëmbinj nënujorë, teksa po kalonin në Zvërnec, duke rrezikuar mbytjen. Ngjarja ka ndodhur rreth orës 04:00 të mëngjesit, në zonën e quajtur ‘Hunda e Plakut’. Skafi me drejtues shtetasin G.V., 61-vjeç, banues në Pavia, ka hyrë në gjirin e Zvërnecit për t’iu afruar plazhit, por ka goditur një shkëmb nën ujë, pasi nuk e njihte zonën. Në mjet ndodheshin shtetasit M. R., 38 vjeç, K.

B., 33 vjeçe dhe një i mitur, banues në Pavia, ndërsa për t’i shpëtuar ka ndërhyrë Policia Kufitare dhe Guarda Di Finanza, të cilët kanë nxjerrë turistët në breg. Të dëmtuarve u është dhënë ndihma e parë dhe janë në gjendje të mirë shëndetësore. Familja nga Pavia kishte shëtitur në Slloveni, Kroaci, Malin e Zi dhe kishin planifikuar të vizitonin jugun e Shqipërisë. Andrea rrëfen se në skaf ndodhej me djalin 4 vjeç, bashkëshorten dhe një mik të familjes. Ai tregon se përdor aplikacionin “Navionics” për lundrimin në det dhe nuk ka pasur probleme në shtetet e tjera, por vetëm kur ka mbërritur në Vlorë. Ai akuzon shtetin shqiptar se nuk ka përditësuar hartën digjitale detare, që paralajmëron rrezikon e shkëmbinjve nënujorë. “Siguracioni nuk na mbulon shpenzimet, sepse ky është një problem i shtetit shqiptar, i cili nuk ka Hartë Detare Digjitale, me referencat themelore të hartografike për lundrimin me varkë”, tha ai. “Jemi nisur këtë mëngjes dhe ishim në kthim nga Sllovenia. Kemi bërë gjithë Kroacinë dhe kemi kaluar në 600 ishuj Kroaci dhe më pas Mali i Zi. Kemi bërë dje udhëtim direkt për në Vlorë, ku në hyrje si gjithë pronarët e varkave përdor një program që të kem lartësinë e skafit me bazën e ujit dhe të jep sinjale për gjithçka që ndodhet nën det. Për fat të keq varka nuk ka sinjalizuar dhe u përplasëm me një shkëmb. Fëmija jonë 4 vjeç ishte në panik. Vetëm për mosinjalizim gjendemi në këtë situatë. Tani jemi në kërkim të zgjidhjes sesi mund të lëvizim varkën që andej. Është një problem me lajmërimet që shteti shqiptar duhet të bëjë pjesën nën ujore. Siç bëjmë ne një gabim dhe penalizohemi edhe shteti shqiptar duhet të penalizohet. Policia e Kufirit dhe Guarda Di Finannza mbërritën menjëherë. Falenderojmë popullin shqiptar që na ndihmuan dhe nuk na morën lekë e na dhanë ushqim”, tha italiani.