KPA shkarkon kryegjyqtarin Dritan Banushi, KPK konfirmon prokurorin Hysni Mulaj
Verdiktet e radhës në Drejtësi për magjistratët. Kreu i Gjykatës së Apelit Gjirokastër u rrëzua në shkallën e dytë, pas ankesës së Komisionerit Publik, kurse KPK e kishte konfirmuar në detyrë. Shkak pasuria e pajustifikuar dhe asetet, avokati e kundërshtoi. KPK gjen të drejta të dhënat financiare të prokurorit të Tiranës, pritet nëse ONM dhe Komisioneri do e kundërshtojnë Mulajn në KPA
Organet e Vettingut japin verdiktet e radhës në Drejtësi për dy magjistratë, një prokuror që u konfirmua dhe një kryetar gjykate që u shkarkua me formë të prerë. Kolegji i Posaçëm i Apelimit vendosi të shkarkojë me formë të prerë, duke rrëzuar vendimin e mëparshëm të KPK-së, për kryetarin e Gjykatës së Apelit të Gjirokastrës, Dritan Banushi, për pamundësi financiare në krijimin e pasurisë së tij. Banushi ishte konfirmuar më parë nga Komisioni i Pavarur i Kualifikimit më 28 janar të vitit 2020, por vendimi u kundërshtua nga Komisioneri Publik, me arsyetimin se KPK nuk kishte vlerësuar drejt pasurinë e subjektit. Debati gjyqësor në këtë çështje u fokusua në tre elementë, që përfshinin kursimet në vite të gjyqtarit dhe mënyrën si ato ishin deklaruar, shpenzimet e jetesës dhe një apartament të blerë në Gjirokastër nga babai i gjyqtarit, për të cilin u pretendua se nuk ka pasur burime. Subjekti dhe avokati i tij Viktor Gumi i kundërshtuan qëndrimet e komisioneres. Ata vërejtën se analiza financiare kishte gabime matematikore dhe se zërat e shpenzimeve ishin bazuar në të dhëna jo zyrtare. Vlerësimi i ankimit ndaj Banushit u shqyrtua nga trupi gjykues i Kolegjit i kryesuar nga Natasha Mulaj, me relatore Albana Shtylla dhe anëtarë Mimoza Tasi, Rezarta Schuetz dhe Sokol Çomo.
Kryesuesja Mulaj sqaroi gjatë shpalljes së vendimit se pas vlerësimit të gjithë shkaqeve të ankimit për pasurinë, si dhe akteve të depozituara është konkluduar se gjyqtari Banushi është gjetur në pamundësi për krijimin e disa pasurive. Sipas Mulajt, subjekti gjendet në pamundësi për blerjen e një automjeti tip Audi në vitin 2007, si dhe për riparimin e tij. Po ashtu, ka rezultuar në pamundësi për krijimin e një depozite 3 milionë lekë në emër të tij dhe të bashkëshortes në vitin 2014. Kolegji konkludon se ka rezultuar pamjaftueshmëri financiare dhe për krijimin e dy depozitave në emër të subjektit, njëra në shumën 2 milionë lekë dhe tjetra 700 mijë lekë. KPA konstaton balancë negative për krijimin e depozitave në emër të vajzës në shumat rreth 100 mijë lekë dhe 3500 euro. Banushi është gjetur në pamundësi dhe për krijimin e gjendjes cash. Ndërsa për apartamentin në Gjirokastër ku subjekti jeton, është konkluduar se është blerë dhe përfunduar nga babai i tij në shumën e përcaktuar në kontratë. Për rrjedhojë, Kolegji vlerëson se subjekti ka kryer deklarim të saktë për këtë pasuri.
KPK konfirmon në detyrë prokurorin e Tiranës, Hysni Mulaj
Po dje, Komisioni i Pavarur i Kualifikimit, ka shpallur vendimin për prokurorin e Tiranës, Hysni Mulaj, duke e konfirmuar në detyrë me 3 vota pro. Vendimi duhet të shpallej rreth një muaj më parë, por u riçel hetimi për pasuritë. Në hetimin paraprak, u konstatuan probleme ekonomike të familjes së prokurorit. Pasi u shanë shpjegimet dhe provat për blerjen e apartamentit me të ardhurat nga puna në bujqësi e babait që kanë shërbyer si burim huaje, u ricel hetimi. Hysni Mulaj nisi karrierën në sistemin e drejtësisë në vitin 1997. Fillimisht punoi në Prokurorinë e Bulqizës dhe që prej vitit 2007, ushtron funksionin në Prokurorinë e Rrethit Tiranë. Tashmë do pritet edhe konkluzioni i Komisionerit Publik dhe ONM, nëse do kërkojnë në KPA konfirmim apo rrëzim të këtij vendimi.