Ilir Meta "thyen" izolimin, pas shumë vitesh shkel në Ambasadën Amerikane

Ilir Meta është pritur nga ambsadorja amerikane Yuri Kim në cilësinë e ish ministrit të Jashtëm në harkun kohor 29 korrik, 2002 – 18 korrik, 2003.

Në një darkë të organizuar me gjithë ish ministrat e Jashtëm, Meta ka mbërritur i pari ku është përshëndetur me shefen e diplomacisë.

Një vit më parë, kreu i shtetit adresoi akuza të forta ndaj Shteteve të Bashkuara ku veç të tjerash solli edhe një skenar ekzekutimi pranë "Malit me Gropa".

Gjithashtu në takim nuk kanë munguar Lulzim Basha, Ditmir Bushati, Tritan Shehu, Kastriot Islami, Olta Xhaçka, etj.

Sa i përket këtij eventi, ambasada amerikane njofton:

"Si pjesë e festimeve tona për 100 vjetorin e marrëdhënieve diplomatike midis Shteteve të Bashkuara dhe Shqipërisë, Ambasadorja Yuri Kim pati nderin të ftojë të gjithë Ministrat e Jashtëm të Shqipërisë që prej vitit 1991, për një darkë të veçantë në Shtëpinë Ryerson.

Ambasadorja Kim shprehu vlerësimin e thellë të Shteteve të Bashkuara për kontributet e dhëna nga secili prej Ministrave në zhvillimet dhe arritjet historike të Shqipërisë, përfshirë përparimin e tranzicionit nga komunizmi në demokraci, rrugëtimin e Shqipërisë në NATO dhe drejt anëtarësimit në Bashkimin Europian, kryesimin e OSBE-së dhe sigurimin e një vendi në Këshillin e Sigurimit të Kombeve të Bashkuara.

Mbi të gjitha, ajo falënderoi Ministrat për rolin e tyre në forcimin e marrëdhënieve midis Shteteve të Bashkuara dhe Shqipërisë, duke kujtuar se të gjithë ata – diplomatë amerikanë dhe shqiptarë – kanë fatin që të mund të ndërtojnë mbi punën e paraardhësve dhe detyrimin për të hedhur bazat për pasardhësit e tyre.