Kushtetuesja i mbyll derën Luan Dacit, ish-magjistratit i mbetet vetëm Strasburgu
Gjykata që interpreton çështjet ligjore të proceseve gjyqësore, konstatoi se nuk ka kompetencë të marrë nën shqyrtim çështje të Komisionit të Pavarur të Apelimit, që bën Vettingun në drejtësi. Verdikti: “Vendimet e KPA-së, nuk shqyrtohen nga ne”. KPA zbatoi pas ndërhyrjes së ONM-së, vendimin e tre shkallëve të gjyqësorit, për dënimin e Dacit me një vit shërbim prove, me akuzën e falsifikimit të dokumenteve. Daci nuk u largua, por kolegët votuan shkarkimin vitin e kaluar. Paralajmëroi se do e ndjekë deri në Strasburg
Gjykata Kushtetuese nuk ka pranuar që të marrë në shqyrtim ankimimin e ish-gjyqtarit, Luan Daci, kundër vendimit të shkarkimit nga Komisioni i Posaçëm i Apelimit. Ish-magjistrati u shkarkua në dhjetor 2021 nga kolegët e tij si anëtar i KPA-së, pasi më herët u dënua nga drejtësia shqiptare me 6 muaj burg për falsifikim dokumentesh, e deklarim të rremë, i kthyer në një vit shërbim prove, në të trija shkallët. Edhe pse ndaj Dacit kishte një dënim kolegët e KPA e anashkaluan dhe ndërhyrja me 2 shkresa e Operacionit Ndërkombëtar të Monitorimit të procesit të Vettingut, i vuri ata në lëvizje për ta shkarkuar, duke e zëvendësuar me një gjyqtar tjetër. Luan Daci, edhe pse kishte një vendim të drejtësisë shqiptare që e ka dënuar dhe një vendim të KPA që e kishte pezulluar ish-gjyqtarin, vijonte të shkonte në punë, duke i sfiduar këto vendime. Ai u dënua me 6 muaj burg, konvertuar në një vit shërbim prove dhe kushtin që mos ushtrojë funksione publike. Hetimet e SPAK bindën Gjykatën e Posaçme kundër Krimit e Korrupsionit dhe Apelin e GJKKO të dënojë Luan Dacin me akuzën e falsifikimit të dokumenteve, për të fituar postin e anëtarit të KPA. Kjo lidhej me fshehjen e një mase disiplinore nga KLD në vitin 1997, me denoncim të ish-ministrit të Drejtësisë së asaj kohe, për paaftësi.
Në dokumentacionin e paraqitur në atë kohë nga gjyqtari i KPA, fshehu faktin se kur ishte gjyqtar në gjykatën e Tiranës në 1997, KLD-ja e shkarkoi nga detyra për shkelje të ligjit. Daci paralajmëroi se do e dërgonte çështjen në Kushtetuese dhe shkalla madhore e interpretimeve ligjore konstatoi se nuk ishte kompetencë e saj gjykimi i vendimeve që merrte KPA-ja. Në këtë mënyrë Dacit i ka mbetur të realizojë vetëm një procedurë juridike të paralajmëruar më herët, dërgimi i çështjes në Strasburg. Më poshtë
disa nga pjesët e vendimit të Kushtetueses:
“Për juridiksionin e Gjykatës:
14-Sipas neneve 131, pika 1, shkronja “f” dhe 134, pika 1, shkronja “i” dhe pika 2 të Kushtetutës, si dhe nenit 71 të ligjit nr. 8577/2000, çdo individ, person fizik ose juridik, subjekt i së drejtës private dhe publike, mund të vërë në lëvizje Gjykatën për gjykimin përfundimtar të ankesave kundër çdo akti të pushtetit publik ose vendimi gjyqësor që cenon të drejtat dhe liritë themelore të garantuara në Kushtetutë.
15-Kolegji vlerëson se në kushtet kur objekt i ankimit kushtetues individual është vendimi i Komisionit Disiplinor të KPA-së, që ka vendosur shkarkimin e kërkuesit nga detyra e gjyqtarit të po atij organi, duhet të analizohet fillimisht juridiksioni i Gjykatës për shqyrtimin e këtij ankimi.
16-Neni 179/b, pika 5, i dispozitave kalimtare të Kushtetutës parashikon se gjatë periudhës kalimtare 9-vjeçare Gjykata do të funksionojë me dy kolegje, një prej të cilëve është KPA-ja. Në mbështetje të këtij parashikimi, dispozitat kushtetuese kanë përcaktuar KPA-në si organin e vetëm gjyqësor që shqyrton ankimet e subjekteve që i nënshtrohen procesit të rivlerësimit kalimtar kundër vendimeve të Komisionit të Pavarur të Kualifikimit (neni F i Aneksit të Kushtetutës), por edhe si organin që shqyrton shkeljet disiplinore të gjyqtarëve të Gjykatës Kushtetuese, anëtarëve të Këshillit të Lartë Gjyqësor dhe Këshillit të Lartë të Prokurorisë, Prokurorit të Përgjithshëm dhe Inspektorit të Lartë të Drejtësisë, si dhe ankimet për vendosjen e masave disiplinore ndaj gjyqtarëve, prokurorëve dhe inspektorëve të tjerë (neni 179, pika 7, i Kushtetutës).
17-Për sa më sipër, Kolegji thekson se kërkimet e paraqitura në lidhje me papajtueshmërinë me Kushtetutën të vendimit të KPA-së nuk hyjnë në kompetencën e kësaj Gjykate. Për rrjedhojë, kërkesa e paraqitur nuk plotëson kriteret ligjore për pranimin e saj për shqyrtim në seancë plenare.
PËR KËTO ARSYE,
Kolegji i Gjykatës Kushtetuese të Republikës së Shqipërisë, në bazë të neneve 31 dhe 31/a, pika 2, shkronja “a”, të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, të ndryshuar,
V E N D O S I:
Moskalimin e çështjes për shqyrtim në seancë plenare”.