Kapen 2,2 tonë kokainë, 2 bosët shqiptarë arratisen, do paguanin 160 mln euro me Bitcoin
E fshehur në ngarkesën me 16 tonë lëng asparagu në kanoçe dhe që vinte nga Lima me kamion, malli u sekuestrua të premten gjatë një operacioni të koduar pikërisht “Bitcoin”. Porositësit ishin 2 shqiptarë të shpallur në kërkim, emrat e të cilëve nuk u publikuan, por u tha se janë edhe kokat e kartelit të narkotrafikut. Do kaloheshin nëpërmjet rrugës detare, me destinacion Holandën. Arrestohen 7 peruanë, menaxheri, shoferët dhe punëtorët
Kartelet shqipfolëse po bëhen çdo ditë edhe më vendimmarrëse e të pushtetshme në botën e narkotrafikut. Dy shqiptarë, identitetet e të cilëve nuk janë publikuar nga autoritetet, u shpallën në kërkim, pasi u kapën 2,2 tonë kokainë e fshehur në ngarkesën me peshë totale 16 tonë kanaçe me lëng shpargu (Asparag) në Peru.
Në pranga kanë rënë ndërkohë 7 peruanë që bënin transportin e lëndës ushqimore. Destinacioni i kokainës raportohet se ishte Holanda dhe do të shitej për 160 milionë dollarë, pagesë e kryer me kriptovalutën Bitcoin, pikërisht edhe me këtë emër u kodua operacioni në fjalë. Shqiptarët që ishin edhe kokat e grupit, mundën të arratiseshin kur diktuan lëvizjet e policisë peruane. Kujtojmë se Peruja, ashtu sikurse edhe Ekuadori, kanë një dalje të mirë për kokainën kolumbiane.
Lëngu i shpragut vinte nga qyteti Trujillo në Lima dhe do të transportohej në rrugë detare nga Callao në Roterdam, Holandë. Rreth orës 16:45 të së premtes, policia hyri në portin e Callaos dhe arrestoi 54-vjeçarin Luis Ernesto Ramos Peláez dhe 27-vjeçarin Jean Carlos Villanueva Evaristo, bashkë-shofer dhe shofer i gjysmërimorkios AFM721. Siç tha kreu i hetuesve peruanë të drogës, Cesar Echevarría, dy shqiptarët ishin autorët e trafikut të drogës. “Është një rrjet me lidhje me Kolumbinë, Ekuadorin dhe Shqipërinë”, tha ai, por pa dhënë identitetet e tyre për shkak të hetimit, ku besohet se është e përfshirë edhe DEA amerikane, që ka në ‘patronazh’ goditjen e ‘arit të bardhë’ që hyn edhe në SHBA nga Amerika Latine.
Droga ishte e kamufluar në kanaçe dhe u transportua në një kamion nga Trujillo në Callao, ku u kap të premten e 10 qershorit dhe më pas u publikuan të shtunën rezultatet. “Kjo organizatë planifikoi të paguante ilaçin me monedha virtuale”, tha kreu i Drejtorisë kundër drogës, Cesar Echevarría.
Sipas tij, bëhet fjalë për një organizatë kriminale me lidhje në Kolumbi, Ekuador dhe Shqipëri.
“Ne po koordinohemi me autoritet e Policisë Ndërkombëtare për të zbuluar vendndodhjen e dy shqiptarëve që kanë mbërritur në vendin tonë në koordinim me mafien shqiptare”, shtoi ai.
Që nga fillimi i vitit, policia peruane ka sekuestruar rreth 35 tonë drogë. Me rreth 400 tonë në vit, Peruja është një nga prodhuesit më të mëdhenj të kokainës në botë.