Plagosja e Hasanbelliut, kapet në Vjenë i kërkuari Kasandër Noga, po vinte në Shqipëri
Nuk zgjat më shumë se tre ditë arratia e “Kasandrit të tmerrshëm’, i akuzuar për 5 vrasje, pjesë më e madhe në sagën e hasmërisë me fisin Hasanbelliu në Fier. Policia shqiptare informoi homologët belgë dhe austriakë, operacioni në vijim për kapjen e të dytit. Plagosën me 6 plumba në mes të Brukselit një tjetër emër të krimit, Erion Hasanbelliun. Ky i fundit i shpëtoi një dënimi për vrasje në vendin tonë dhe u rikthye në Belgjikë pas ekstradimit që i bënë më 2013
Nuk ka zgjatur më shumë se tre ditë arratia e një prej emrave më të njohur të botës së krimit shqiptar. Kasandro Noga, i dyshuar si autor i atentatit ndaj Erion Hasanbelliut në Belgjikë mbrëmjen e së dielës, është arrestuar nga policia e Vjenës në Donaustadt, bazuar në një urdhër kërkimi. Mediat e huaja raportojnë se lokalizimi për arrestimin e 45-vjeçarit është kryer në bashkëpunim mes policisë belge dhe asaj shqiptare, pikërisht të dhënave të Interpol Tiranës. Kasandër Noga u arrestua teksa po dilte nga shtëpia e tij, për të shkuar në aeroport, me qëllim ardhjen drejt Tiranës dhe më pas zhdukjen e gjurmëve.
Kasandro Noga akuzohet se së bashku me një tjetër person, qëlloi me 6 plumba pistolete pas shpine Erion Hasanbelliun, alias Mikel Rakipllari, para hyrjes së një hoteli në Adolphe Maxlaan në Bruksel, pranë De Brouckèreplein në qendër. Sipas dëshmitarëve okularë, dy persona kanë qëlluar në drejtim të Erion Hasanbelliut, duke e lënë të plagosur rëndë, ndërsa gjithçka është filmuar nga kamerat e sigurisë së hotelit. Fal filmimeve dhe dëshmive u identifikuan edhe agresorët, teksa motivi kryesor besohet se është hakmarrja dhe saga e gjakmarrjes mes dy fmiljeve, e nisur që prej vitit të trazirave 1997 në Fier. Hasanbeliu mësohet se vijon të mbahet nën terapi intensive dhe në gjendje kritike shëndetësore, për shkak të plagëve të rënda që mori nga atentati. Interpol Tirana po bashkëpunon me autoritetet belge për çështjen e Nogës, i cili është i akuzuar për 5 vrasje në Shqipëri dhe në veçanti atë që njihet si “Masakra e Sanatoriumit” në Tiranë në vitin 2000, me dy të vrarë.
Dyshohet se tentativa për vrasje ka ndodhur për shkak të hasmërive mes Erion Hasanbelliu dhe Kasandro Nogës. Gjithçka nisi në vitin 2000, kur Kasandro Noga, i veshur si polic, hyri me automatik në dorë bashkë me Julian Çelën dhe pasi kanë shkelmuar derën e reanimacionit ku ndodheshin te shtruar Aqif Hasanbelliu (babai i Erion Hasanbelliu) dhe Dritan Hajdini (shoku i Erionit dhe Geronit), u ka hequr serumin nga krahu dhe me breshëri automatiku i ka lënë të vdekur në vend. Por disa vite më parë, Noga akuzonte fisin Hasanbelliu se i kishin vrarë vëllanë e tij në Fier. Më pas hakmarrja vazhdoi edhe me një seri ngjarjesh të tjera, pasi Erion Hasanbelliu bashkë me vëllanë, Geron Hasanbelliu, akuzohen se ekzekutuan Julian Çelën dhe plagosën rëndë Kasandro Nogën në vitin 2002, në Belgjikë. Noga ka qenë student i Akademisë së Policisë, por është përjashtuar para se të diplomohej, më konkretisht në vitin e dytë të studimeve, sepse pas një sherri në ambientet e shkollës plagosi me thikë një student nga Lushnja, me të cilën rezultoi se kishte dhe lidhje gjaku. Pavarësisht këtij krimi, 44-vjeçari pas dy vitesh bëri krimin në spitalin e Sanatoriumit. Thuhet se shumë prej krimeve që rëndojnë ndaj Nogës janë kryer gjatë kohës që ishte student i Akademisë, edhe pse nuk është faktuar, ku përshkruhej nga të gjithë si njeri problematik, gjakftohtë, por shumë inteligjent. Po ashtu Noga akuzohet se në vitin 1999 ka bërë dy vrasje, të cilat u zbuluan në vitin 2003. Mes këtyre krimeve është dhe akuza për vrasjen e Astrit Shperdhejas, më 25 gusht të 2001, ndërkohë që gjyqi u bë në Belgjikë në 2005. Po ashtu është dënuar edhe për vrasjen në vitin 1999 në Patos, të Kastrito Gropa dhe Edison Meminajt. Pavarësisht këtyre krimeve të rënda, autori arriti që të ishte i lirë, teksa drejtësia shqiptare gjithnjë ka çaluar në dosjen e tij, si me ekstradimet, ashtu dhe me izolimin për krimet e kryera ndër vite.