Akuzohen se përlanë 3,5 mln lekë duke i montuar Prokurorisë së Elbasanit kondicionerë me difekte, Apeli i Tiranës liron 3 biznesmenët dhe teknikun!

Gjykata e Apelit Tiranë ‘shpërblen’ 3 administratorët e firmave dhe teknikun, që akuzohen se ‘i bënë gol’ Prokurorisë së Rrethit Elbasan, duke u instaluar kondicionerë difektozë dhe përlarë 3,5 mln lekë nëpërmjet tenderit të zhvilluar për sistemin ngrohës-ftohës të godinës. Vendimi është marrë dje nga shkalla e dytë në kryeqytet, që rrëzoi të parën që i la në burg të dyshuarit.

Apeli ka lehtësuar masat e sigurisë, duke vendosur detyrim paraqitjeje për Ardian Lloshin, administrator në “Tirana Supervizor”, Ibrahim Dragoshin, administrator në “IMES-D”, të 2 të arrestuar, si edhe Dedë Malutën, administrator te shoqëria “Junik” dhe drejtuesin teknik, Vladimir Maluta, të cilët ishin të shpallur në kërkim nga Policia. Gjykata e Apelit rrëzoi kështu vendimin e datës 28 maj 2022 të Gjykatës së Shkallës së Parë Tiranë, e cila i kishte lënë në burg.

Të katërt, në koordinim me njëritjetrin, akuzohen se kanë montuar në Prokurorinë e Elbasanit pajisje për ngrohje dhe ftohje, të cilat kanë rezultuar me defekt dhe jashtë përdorimit pasi janë instaluar, duke shkaktuar një dëm prej 3.009.714.29 lekë (2,869.714.29+140. 000.00). Godina e re e Prokurorisë pranë Gjykatës së Shkallës së Parë Elbasan, është marrë në dorëzim në dhjetor të vitit 2017. Në fillim të muajve të verës të vitit 2020, në sistemin e ftohjes janë konstatuar disa problematika, që kanë pasur të bëjnë me mosfunksionimin e aparaturës Chiller të instaluar nga subjekti ndërtues (nënkontraktor). Në vijim, me afrimin e periudhës së dimrit (rreth muajit nëntor), ka rezultuar se pajisja “Chiller” nuk ka funksionuar fare, përsa i takon procesit të ngrohjes në institucion. Nga disa verifikime dhe të dhëna paraprake të marra nga specialistë të fushës ka rezultuar se pajisja në fjalë kishte dalë nga funksionimi. Në vijim të komunikimeve të vazhdueshme dhe institucionit të Prokurorisë së Përgjithshme, është dërguar një grup specialistësh për verifikim në vend dhe ka rezultuar e njëjta problematikë. Me raport, më 13 janar 2021 rezultoi shkelja dhe abuzimi nga kompanitë dhe u nisën hetimet, duke kërkuar arrestimin e të dyshuarve. Për shkak të konfliktit të interesit si palë, çështja iu kalua nga Elbasani, kolegëve në kryeqytet.