Mbyllet bojkoti 4 ditor i avokatëve, paralajmërohet përshkallëzimi nëse Qeveria s’i dëgjon
Dje u mbyll bojkoti katër ditor i lajmëruar dhe zbatuar nga avokatët, përveç atyre penalistë, pasi e konsiderojnë hartën e re një shkelje e të drejtës së qytetarëve dhe të shpenzueshme. Kreu i Dhomës së Avokatisë i shkruan Qeverisë që të dëgjohen sugjerimet. Në të kundërt: “Do përshkallëzojmë qëndrimin tonë në të ardhmen, drejt një bojkoti total!”
Përfundoi dje bojkoti 4 ditor i avokatëve, që janë kundër hartës së re gjyqësore, e propozuar nga Këshilli i Lartë Gjyqësor. Dhoma Kombëtare e Avokatëve i kërkoi dje me një letër publike Këshillit të Ministrave, si organ vendimarrës për miratimin e hartës gjyqësore, të marrë në konsideratë vërejtjet dhe propozimet e bëra, përndryshe thekson se do të përshkallëzojnë qëndrimin e tyre në të ardhmen, drejt një bojkoti total dhe pa afat.
Sipas Dhomës Kombëtare të Avokatisë së Shqipërisë, e drejtuar nga Maks Haxhia, “bojkoti përmbushi qëllimin për të cilin u mor ky vendim, duke e konsideruar si fillim të një procesi për përmbushjen e kërkesave të lidhura me ushtrimin e profesionit të avokatit”. Dhoma Kombëtare e Avokatisë, thotë se “me keqardhje është konstatuar se kjo hartë gjyqësore është në shkelje të plotë të së drejtës së individit për aksesin në drejtësi, mungesën e eficencës në realizimin e të drejtës e mbrojtjes së qytetarëve, si dhe në rëndimin e situatës ekonomike-sociale të individit”. Harta e re gjyqësore ka sjellë diskutime dhe reagime mes avokatëve. Dhoma e Avokatisë vendosi bojkot të të gjithë seancave të gjyqësorit për 4 ditë, nga data 14-17 qershor, duke paralizuar pothuajse gati 800 seanca në ditë, ndërsa kundër kanë dalë avokatët penalistë, të drejtuar nga
Sajmir Visha, që shkojnë në seanca, sepse mendojnë që çështja duhet të shkojë në Gjykatën e Kushtetuese për të kundërshtuar KLGJ. Gjithsesi Haxhia ka paralajmëruar përshkallëzimin, nëse Qeveria nuk merr parasysh sugjerimet e Dhomës, ku kërkohet të paktën të jenë 3 Apele dhe disa gjykata rrethi më shumë se sa parashikon harta e re e Ministrisë së Drejtësisë dhe KLGJ-së.
13 gjykata të Shkallës së Parë, 2 Gjykata Administrative dhe 1 Gjykatë Apeli për të gjithë vendin parashikon riformatimi i propozuar, për shkak të vakancave në sistem të krijuara nga reforma në drejtësi dhe Vettingu, pasi mungojnë 184 gjyqtarë. Ky është përfundimisht propozimi i Këshillit të Lartë Gjyqësor për hartën e re gjyqësore në vend, pas muajsh konsultimesh me grupet e interesit. I vetmi ndryshim nga propozimi i kaluar është se është shtuar një gjykatë e shkallës së parë në Sarandë, që me propozimin e kaluar ishte hequr. KLGJ ka miratuar draftin, i cili tashmë pritet të kalojë për mendim në Këshillin e Ministrave, Këshillin e Lartë i Prokurorisë, Prokurorisë së Përgjithshme dhe Ministrisë së Financave. Me vendimin e ri shkrihen gjykatat në Tropojë, Krujë, Lushnjë, Pogradec, Krujë, Mat, Përmet, Kurbin, Kavajë, Pukë. Dhoma e Avokatisë kërkon të ketë të paktën Apele në Durrës, Elbasan, Vlorë, Shkodër dhe Korçë, që janë qarqe të mëdha.
LËVIZJA