Zbulohet ‘depo’ tjetër armatimi, një i arrestuar. Dyshohet për grup të organizuar kriminal
Informacionet dhe rrëfimet për Policinë çuan agjentët te garazhi i një pallati te “Liqeni i Thatë”, rruga “Peti”. Në pranga Eno Papa, që mbante edhe mbiemrin Beqiri, e kishte marrë me qira ambientin, pritet zbërthimi i dëshmisë. Sekuestrohen snajpera, paruke, kallashnikovë, pistoleta me silenciatorë, eksplozivë, automatikë, targa false, mjete dhe të tjera. Operacioni i dytë pas atij “Silent” në Kashar, me dy të arrestuar ‘mjeshtra tornitorë’ , që modifikonin armët dhe qindra materiale
Një jetër ‘depo armatimi’ është zbuluar në mes të Tiranës, pas asaj në zonën e Kasharit, pranë Mëzezit, javën e kaluar, me dy persona të arrestuar. Snajpera, kallashnikovë, armë zjarri automatike, pistoleta me silenciatorë, fishekë, eksploziv, paruke, pasaporta të falsifikuara dhe municione të tjera u gjetën të fshehura në garazhin e një pallati në Tiranë, në zonën e “Liqenit të Thatë”. Kjo “depo” armësh ishte në pallatin e lokalizuar në rrugën “Peti” në kryeqytetit dhe zbulimi i saj u bë pas informacioneve të marra në rrugë operative, por besohet se mund të ketë qenë edhe dëshmia e ndonjë të arrestuari të penduar së fundmi.
Garazhi ishte marrë me qira nga 27-vjeçari, me dy mbiemra, i identifikuar si Eno Papa (Beqiri), teksa ky është arsenali i dytë i armëve që është gjetur në Tiranë brenda një harku kohor prej më pak se një jave. 27-vjeçari, përveç garazhit dhe armët, iu sekuestruan në cilësinë e provës materiale edhe 3 aparate celulari, 2 laptopë dhe një pasaportë e dyshuar e falsifikuar.
Ky operacion vjen si vazhdimësi e operacionit të koduar “Silent”, që u bë në 16 qershor, ku në pranga ranë Elvis Bakalli, 30 vjeç dhe Dorian Kalo, 45 vjeç, të njohur edhe si mjeshtra tornitorë të riparimit dhe modifikimit të armatimeve. Nuk dihet nëse kanë një lidhje mes operacioneve, megjithatë vijojnë hetimet për identifkimin dhe kapjen e personave të tjerë të implikuar në këtë veprimtari kriminale. Çfarë u gjetën brenda garazhit Policia e Tiranës bëri edhe inventarin e armatimit të sekuestruar. U gjetën; 2 snajpera, 4 armë zjarri kallashnikov, 2 armë zjarri automatike, 4 armë zjarri pistoleta me silenciator, 85 pako me fishekë të kalibrave të ndryshëm, një sasi e konsiderueshme krehra armësh, pjesë të ndryshme armësh, shënjestra optike për armët e precizionit (snajper), tre kallëpe tritoli, sasi lënde e dyshuar eksplozive, 2 palë portotarga elektrike për fshehjen e targave, një automjet, 3 aparate celulare, 2 laptopë, 5 paruke dhe një pasaportë e dyshuar e falsifikuar. Ka dyshime se ky arsneal i përkiste ndonjë grupi të organizuar që merrej edhe me grabitje, për shkak të materialeve si paruke dhe targa false, që janë gjetur në garazhin e pallatit.