KPA shkarkon gjyqtaren Rilinda Selimi, shkak kontaktet me një të hetuar për trafik droge
Largohet përfundimisht nga sistemi i drejtësisë gjyqtarja e Apelit të Tiranës, me karrierë të nisur prej vitit 2000. ONM dhe Komisioneri kërkuan rivlerësimin e saj në të tri kriteret, teksa Apeli rrëzoi dje vendimin e KPK, i marë në vitin 2020. Rilinda Selimi kishte lidhje familjare me një të dënuar për moskallëzim krimi, i hetuar ndër vite edhe për narkotrafik
Apeli i Vettingut rrëzon shkallën e parë dhe shkarkon nga detyra gjyqtaren Rilinda Selimi. KPK e konfirmoi gjyqtaren e Apelit Tiranë më datë 14 dhjetor 2020, ndërsa më 28 janar të 2021 bëri publik vendimin e Komisionerëve Publikë dhe ONM, që kërkuan ndryshimin e vendimit në KPA. Ata kërkuan rivlerësim të gjyqtares në të tre kriteret; të të pasurisë, figurës personale dhe asaj profesionale, duke animuar procesin te Komisionerët Publik, që ai ta dërgojë për rishqyrtim në Kolegjin e Posaçëm të Apelimit.
Komisioni e konstatoi atë të papërshtatshme në kriterin e figurës. Në përmbledhje të vendimit trupa kryesuar prej Sokol Çomos, me relatore Rezarta Schuetz dhe anëtarë Natasha Mulaj, Albana Shtylla dhe Mimoza Tasi, vuri në dukje se kontaktet me një person me inicialet F.D., e shkuara e të cilit kishte qenë ndër elementët penalizues edhe në rivlerësimin e bashkëshortit të Selimit, e bënin gjyqtaren të papërshtatshme. F.D., sipas KPA, edhe pse ishte dënuar vetëm për “moskallëzim krimi”, kishte qenë i hetuar që prej vitit 2013 për trafik të narkotikëve. Kolegji arsyetoi se kontaktet e gjyqtares me këtë person nuk ishin rastësore, por se ata kishin lidhje familjare.
Në fund, Kolegji arsyetoi se gjyqtarja Selimi nuk arrin nivel të besueshëm sa i përket kriterit te “pastërtisë së figurës” dhe se duhej të shkarkohej nga detyra. KPA në të njëjtin vendim rrëzoi kërkimet e Komisionerit Publik në kriterin e pasurisë. Rilinda Selimi, gjyqtare pranë Gjykatës Administrative të Apelit, u konfirmua në detyrë në 14 dhjetor 2020 nga trupa e Komisionit të Pavarur të Kualifikimit drejtuar nga Pamela Qirko, me relator Lulzim Hamitaj dhe anëtar Olsi Komici.
Por Operacioni Ndërkombëtar i Monitorimit, rekomandoi menjëherë apelimin e vendimit, duke arsyetuar se KPK nuk kishte hetuar apo kishte hetuar sipërfaqësisht disa prej problemeve të gjyqtares që preknin të tre kriteret e rivlerësimit. Më herët KPK dhe KPA shkarkuan edhe Shkëlzen Selimin, bashkëshorti i gjyqtares dhe ish-gjyqtar në Gjykatën e Lartë, për shkak të kontakteve me persona të përfshirë në krimin e organizuar.
Selimi e ka filluar karrierën në sistemin e drejtësisë në vitin 2000 dhe ka punuar përgjatë një dekade si gjyqtare në Gjykatën e Fierit. Në vitin 2010, Selimi është transferuar në Gjykatën e Tiranës, ndërsa prej vitit 2013 e ushtron funksionin në Gjykatën Administrative të Apelit.