Biznesmenit Dritan Llanaj iu dogjën tre makina në garazh, autorët e dinin mirë shënjestrën. Motiv dyshohen konfliktet për pronat
Autorët e sulmit me zjarr në garazhin e një pallati në “Astir” duket se kanë qenë të informuar mirë për çfarë kishte të parkuara brenda. Tre nga katër mjetet e shkrumbuara mëngjesin e së martës, kanë qenë në pronësi të biznesmenit Dritan Llanaj, vëllai i ndërtuesit Sino Llanaj, njëkohësisht pronar i pallatit ku ra zjarri. Policia dyshon si pistë kryesore konfliktet e biznesmenit ndër vite, por autorët mbeten të panjohur, teksa po verifikohen ende pamjet nga kamerat e sigurisë. Dje ashensori është vënë në funksion dhe uji është lidhur për banorët, teksa shumë prej tyre iu desh të evakuoheshin dhe 8 përfunduan në spital të asfiksuar. Punëtorët po kujdesen të rikthejnë internetin dhe riparimin e rrjetit elektrik që është dëmtuar. Aparaturat që shpërndajnë internetin janë deformuar plotësisht nga nxehtësia. Burime të zjarrfikëses thanë se për fat të mirë struktura e pallatit nuk është dëmtuar për shkak të flakëve. Banorët mund t’i rikthehen normalitetit shumë shpejt, të paktën pas pastrimit të ajrit dhe blozës në apartamente. Shkak i bilancit dramatik sipas ekspertëve, ka qenë kapaku i mbyllur i ajrosjes në garazh, që duhet ta përcillte tymin në tarracë, duke e lënë atë në ambientet e brendshme. Sipas verifikimit të deritanishëm, në pronësi të Llanajt nuk ishte vetëm “Range Rover” objekt i sulmit, por edhe dy makina të tjera, po të shkrumbuara. Policia konfirmon se hetimi është përqendruar në problematikat me pronat dhe certifikatat që familja Llanaj ka pasur në vitet e fundit, me qytetarë të ndryshëm. Por banorët e pallatit nuk janë në dijeni të problematikave të pronarëve. Policia ka sekuestruar kamerat e sigurisë rreth e përqark pallatit, ndërsa po verifikohen të gjitha filmimet për të parë lëvizjet e dyshimta të autorëve, për të shkuar drejt identifikimit dhe gjurmimit të tyre.