Prokuroria heton listën e zyrtarëve të Kadastrës, që kanë futur duart në 2100 regjistra

Pas denoncimit nga drejtori Artan Lame dhe nisjes së procedimit penal kryesisht, për zbardhjen e përgjegjësve dhe dëmit, hapi i radhës ka qenë verifikimi i listës së punonjësve që kishin akses për të ndërhyrë në dosjet e pronave të tjetërsuara. Pas Durrësit dhe Vlorës, edhe Tirana i shtohet grupit të batërdisë me pronat, për qëllim ndërtimesh. Më problematike, ndërhyrja në zonat e ish-komunave periferike të kryeqytetit

Pas njoftimit të skandalit të denoncuar nga kreu i Kadastrës, Artan Lame, për dosjet e zhdukura ndër vite të tokave dhe abuzimet me tjetërsimin në shumë njësi të kryeqytetit, organi i akuzës ka nisur hetimet prej disa ditësh. Aktualisht mësohet se Prokuroria e Tiranës ka nisur edhe sekuestrimin e listës së punonjësve që kanë pasur akses në regjiistrat e pronësisë në Kadastrën e Tiranës (ish-Hipoteka dhe ish-Aluizni). Ky hetim po ndiqet nga kryeprokurori Tiranës në detyrë, Arens Çela dhe përfshinë një rrjedhë kohore prej më shumë se një dekadë aktiviteti shkresor dhe protokollar. Në bazë të veprimeve të kryera me dokumentet e tjetërsimit të pronave në zonat përkatëse, do të arrihet të zbulohen edhe punonjësit që kanë kryer ndërhyrjet, përveç dëshmive bashkëpunuese që mund të merren nga administrata vullnetarisht apo me thirrje, prej hetuesve.

Hetimet për Kadastrën e Tiranës kanë nisur pas skandalit ku 2100 regjistra pronësie ishin të totalisht të dëmtuar. Pas denoncimit nga vetë kreu i Kadastrës, Artan Lame, për abuzimet, Prokuroria hapi procedim penale kryesisht për veprat “shpërdorim detyre” dhe “zhdukje e vjedhje e dokumenteve”.

Abuzimet më të mëdha janë bërë dhe konstatuar me pasuritë në zonat në zhvillim të kryeqytetit si; Farkë, Kashar, Yzberisht, Mëzez, Dajt, Ndroq, Shëngjergj, Kamëz, Vorë, Bathore, Babrru etj.

Për të shmangur presionet, Lame tha se “ky raport i është dërguar Kryeministrisë dhe Ministrisë së Drejtësisë, ndërsa do të përgatitet një raporti i detajuar për Kadastrat e çdo qyteti”. Paralelisht për këto raste verifikon nga ana administrative edhe Njësia Antikorrupsion që ka hapur dikasteri i Drejtësisë prej kohësh.

I njëjti skandal është konstatuar edhe në Kadastrën e Durrësit, ku shkrirja e saj dhe nisja e hetimeve të thelluara për abuzimet nxorën një raport me shkeljet, ku u vu re se abuzimet janë përtej imagjinatës dhe zonat ku janë kryer paligjshmëri dhe plaçkitjet më të mëdha janë ato bregdetare të Durrësit si Plazh, Spitallë, Lalëz, Draç, Rodon, etj. Në Kadastrën e Durrësit vetëm 15% e dosjeve ishin pa probleme, ndërsa Prokuroria ka nisur hetimet.