Operacioni i bujshëm për mashtrimet e spanjollëve me Call-Center, lirohen 15 të shoqëruarit në Vlorë dhe Elbasan

Operacioni i bujshëm i Policisë së Shtetit dhe Guardia Civil të Spanjës duket se nuk ka dhënë frytet e duhura. Të gjithë të shoqëruarit e të martës në Vlorë, në bizneset ‘Call Center’, janë liruar dje. Policia konfirmon se nuk ka asnjë person të arrestuar nga 15 që u morën në pyetje. Ndërkohë hetimi vazhdon për personat që janë përfshirë në skemat e mashtrimit përmes këtyre subjekteve, ku të dëmtuar janë qindra qytetarë spanjollë. Disa prej të dyshuarve mësohet se janë arratisur pa mbërritur policia për kontrolle. Operacioni u zhvillua një ditë më parë nga SPAK, ndërsa dy ‘Call-Center’ në Vlorë, të cilët dyshohet se mashtronin qytetarë, janë bllokuar. SPAK ka sekuestruar kompjuter dhe prova materiale, të cilat mund të çojnë në zbulimin e skemave të mashtrimit ose personave të përfshirë në të. Ka qenë një letër-porosi që ka vënë autoritetet hetimore në lëvizje, duke kryer mësymje edhe në Elbasan, bashkë me oficerët e Byrosë

Kombëtare të Hetimit. U zhvilluan kontrolle në disa “Call-Center”, me dyshimet për skema mashtrimi me kriptomonedha dhe bursa fiktive. Në Elbasan po kërkohej një person i dyshuar që u arratis në momentin e fundit, kurse kontrolli u krye në bizneset e një qendre tregtare, pranë stadiumit të qytetit. Subjektet e dyshuara janë identifikuar nëpërmjet IP-ve. Burimet thanë se prej disa muajsh SPAK ka marrë letër-porosi të dërguara nga Gjermania, Italia dhe Spanja, të cilat raportojnë një numër të madh të qytetarëve të tyre të mashtruar për investime në bursa fiktive apo edhe në kriptomonedha. Deri tani dëmet e evidentuara në pesë vitet e fundit shkojnë në rreth 50 mln euro, nëpërmjet mashtrimeve.