Përcillet komisari, “dëshmor i atdheut”
Është
përcjellë për në banesën e fundit trupi i pajetë i Kryekomisar Adem Tahiraj, nën zhurmën e të shtënave të armëve. Si “Dëshmor i Atdheut”, trupi i tij është varrosur në Varrezat e Dëshmorëve, pranë katër kolegëve të tij, të vrarë 3 vite më parë nga Dritan Dajti. Krerët më të lartë të shtetit bënë homazhe e më pas arkivoli me trupin e Tahirajt u zhvendos në Varrezat e Dëshmorëve, ku dhe iu dha lamtumira e fundit në prani të familjarëve, ministrit të Brendshëm Flamur Noka dhe drejtuesve më të lartë të Policisë së Shtetit. Kryeministri Sali Berisha vizitoi djeshme, familjen e kryekomisarit Adem Tahiraj. Shefi i qeverisë, duke dënuar aktin kriminal i shprehu ngushëllimet e tij familjes Tahiraj, teksa theksoi se në dhimbjen e tyre bashkohet e gjithë Shqipëria. Kryeministri, duke nënvizuar se humbja e Tahirajt nuk kompensohet me asgjë, theksoi se shteti do bëjë gjithçka për të vënë drejtësinë në vend. “Do bëhet gjithçka që drejtësia dhe ligji të thonë fjalën e tyre. Të hetohet çdo aspekt dhe detaj i këtij krimi makabër”, theksoi Berisha.