Dule: Pakti detar të mos interpretohet me folklor
Kreu i PBDNJ: Normat e së drejtës ndërkombëtare janë prioritet “Statusi, do marrim përgjigje pozitive”
Në mbledhjen e degës lokale të Partisë Bashkimi për të Drejtat e Njeriut në Korçë, kryetari, Vangjel Dule deklaroi dje se “pakti detar me Greqinë nuk duhet interpretuar në mënyrë folklorike”. Sipas tij, kjo gjë sjell dëmtimin e marrëdhënieve me Greqinë, por dhe interesat e vendit tonë. Në lidhje me këtë u shpreh ai, se “ka vendim gjykate, normat e së drejtës ndërkombëtare janë prioritet”. Në lidhje me statusin e vendit kandidat në Bashkimin Europian, Dule është shprehur optimist për marrjen e përgjigjes pozitive në muajin tetor. “Vendi ynë do e marrë statusin jo si meritë e politikës shqiptare, por si një predispozitë e vendeve të BE- së dhe e dëshirës së shqiptarëve për të qenë pjesë e BE- së”,- tha ai. Edhe dy ditë më parë përfaqësuesi i minoritetit grek në Parlamentin shqiptar deklaroi se nuk duhet ndryshuar marrëveshja Tiranë- Athinë për kufirin detar, por Kushtetuta e Shqipërisë që pengon hyrjen e saj në fuqi. “Marrëveshja ishte në frymën dhe gërmën e së drejtës ndërkombëtare të detit, ku Shqipëria dhe Greqia janë palë. Nëse ka pasur aspekte të cilat bien në kundërshtim me të drejtën e brendshme të vendit tonë, atëherë është kjo që duhet të ndryshojë. Duhet të bëhen ndryshimet, amendimet në legjislacionin tonë të brendshëm, një legjislacion i pakonsoliduar dhe tranzitor dhe t’ia përshtatim atë frymës së të drejtës ndërkombëtare të detit”,deklaroi Dule.
NEGOCIATAT
Qeveria shqiptare nuk ka asnjë afat se kur do të nisë rinegocimin e paktit detar me Greqinë. Por sipas ministrit të Jashtëm Edmond Panariti, “kjo nuk do të ndodhë në çdo moment që do të dëshirojë shteti fqinj, por kur pala shqiptare të jetë gati”. Madje sipas tij “rinegocimi i marrëveshjes për ndarjen e ujerave territoriale me Greqinë mund të realizohet nga qeveria e ardhshme pas zgjedhjeve parlamentare të vitit 2013”. Ndërkohë dy ditë më parë Ministria e Jashtme pranoi zyrtarisht se Greqia ka kushtëzuar integrimin e Shqipërisë me marrëveshjen e kufirit detar, duke mos e njohur vendimin e Gjykatës Kushtetuese. Duke kritikuar deputetët që kanë nxjerrë një dokument për përdorim të brendshëm në MPJ, Sekretari i Përgjithshëm i këtij institucioni, Gazmend Turdiu, konfirmoi se të tre skenarët në fjalë i janë paraqitur qeverisë shqiptare. “Shprehim keqa- rdhje që dokumentet zyrtare bëhen publike në mënyrë të papërgjegjshme në cënim të funksionimit të institucioneve shtetërore”, - theksoi mes të tjerash Turdiu. Nga ana tjetër, Partia Socialiste, nëpërmjet nënkryetarit të komisionit parlamentar të Sigurisë Kombëtare, Ilir Gjoni ka deklaruar se do ta çojë çështjen e paktit detar me Greqinë në Gjykatën Ndërkombëtare në rast se Athina zyrtare vendos të zbatojë në mënyrë të njëanshme marrëveshjen e rrëzuar nga Gjykata Kushtetuese e Republikës së Shqipërisë.