Prokuroria: Nazime- Fiqiri, të dashur
Gjykata e Tiranës lë në burg pa afat të akuzuarën për vrasjen e 45- vjeçarit në Krrabë “S’ka patur presione, por lidhje të qëndrueshme, solide”
Fakte të reja kanë dalë në dritë gjatë seancës së djeshme për caktimin e masës së sigurisë për Nazime Vishën, e akuzuar për vrasjen e Fiqir Muçës. Pas përfundimit të afatit 30- ditor të arrestit me burg, Prokuroria i është drejtuar sërish Gjykatës së Tiranës me kërkesën për caktimin e masës burg pa afat për 18- vjeçaren. Prokurori nga ana e tij deklaroi se pasi është administruar telefoni dhe i është nënshtruar ekspertizës, ka rezultuar se 18vjeçarja nuk ka pasur presion nga Muça, por ka qenë një komunikim normal mes dy personave që kanë një lidhje mes tyre. Ndërkaq, Gjykata e Tiranës pasi dëgjoi pretendimet e të dy palëve, vendosi të lërë në burg pa afat 18- vjeçaren.
PROVAT E PROKURORISË
Gjatë seancës së djeshme, përfaqësuesi i organit të akuzës, prokurori Blerim Tominaj është shprehur se gjatë kësaj periudhe është administruar telefoni i viktimës, ku janë gjetur disa sms dhe foto. “Nga analiza e tyre rezulton që e dyshuara nuk ka pasur asnjë presion. Mes tyre ka pasur një komunikim normal dhe se është komunikimin mes dy njerëzve që kanë një lidhje të qëndrueshme dhe solide”, – është shprehur në sallë prokurori. Gjithashtu, prokurori bën të ditur se është provuar se Nazime Visha nuk ka pasur asnjëherë presion nga viktima, njëkohësisht dhe largimi i saj nuk është bërë në kushtet e presionit, sepse sipas prokurorit, ekziston një SMS një ditë përpara largimit nga banesa, ku 18- vjeçarja i shkruan se “nesër do ikim”.
Nga ana tjetër, organi i akuzës shprehet se nuk është i qartë fakti nëse familjarët e Vishës ishin në dijeni të lidhjes së tyre, por në mënyrë indirekte ata mund të kenë pasur dijeni, pasi në SMS- të e shkëmbyera, 18- vjeçarja përveç se kërkonte gjëra për vete, i kërkonte dhe gjëra për shtëpinë.
I vetmi moment ende enigmë, sipas Prokurorisë, është fakti që nuk kuptohet ndryshimi i qëndrimit të Nazime Vishës, nga sjellja normale, e cila konfirmohet dhe nga dëshmia e taksistit, tek vrasja.
DOSJA
Më datë 13.08.2012 shërbimet e policisë gjyqësore janë njoftuar se në fshatin Krrabë, Tiranë, ishte vrarë me armë zjarri Fiqiri Muça. Referuar procesverbalit të këqyrjes së vendit të ngjarjes rezulton se në datën 13.08.2012, ora 02: 30 rezulton se në fshatin Krrabë dhe pikërisht në lagjen afër xhamisë së këtij fshati në bahçen e banesës së Dalip Vishës, si dhe në rrugën rrotull saj pranë një bandiere betoni janë gjetur gëzhoja fishekësh armë zjarri në formë shisheje me ngjyrë si ajo e bakrit me kapsollë të goditur me markerin të stampuar në fundin e tyre numrat 71- 66 me një distancë 7.5 m nga banesa e Dalipit. Këqyrja ka vazhduar në një lëndinë me bar dhe në distancë prej 130 m, në një përrua në terren të pjerrët dhe të shkelur, ku është konstatuar kufoma e një mashkulli, që në pjesën e fytyrës kishte një plagë të madhe me shqyerje të zonës së syrit të majtë dhe rrotull tij, si dhe në shkurret anash këmbëve u vunë re njolla të kuqe si ato të gjakut. Pas kryerjes së veprimeve të para hetimore, oficerët e policisë gjyqësore bënë arrestimin në flagrancë të Nazime Vishës, e cila ka pranuar se është autore e vrasjes së Fiqiri Muçës, duke parashtruar si shkak të vrasjes faktin se kishte ardhur për ta rrëmbyer dhe se gjatë një periudhe 4- vjeçare kishte kryer me të marrëdhënie seksuale kundër dëshirës së saj, duke përfituar nga marrëdhëniet e afërta familjare që familja e saj kishte patur me viktimën. Në vijim, në cilësinë e provës materiale janë marrë faktorët plotësues të qitjes së personave të pranishëm në vendin e ngjarjes dhe konkretisht personit nën hetim Nazime Visha, Dalip Vishës ( gjyshi), Behar Visha ( xhaxhai) Besnik Visha ( xhaxhai) dhe Mirvet Bardhi ( taksisti).