Berisha: Vizita e Klinton, nder i madh për vendin
“Ngjarja më e rëndësishme për 100- vjetorin e Pavarësisë” Kryeministri: Marrëdhënie të shkëlqyera
Kryeministri, Sali Ber isha e konsideron viz itën në Tiranë të Sekretares amerikane të Shtetit, Hillari Klinton si ngjarjen më të rëndësishme në 100- vjetorin e Pavarësisë. Kryediplomatja amerikane vjen në Tiranë me ftesë të Kryeministrit të vendit Sali Berisha më datën 1 nëntor. Për z. Berisha, “lajmi i vizitës së Sekretares së Shtetit Hillari Klinton, mikes së shquar të Shqipërisë dhe kombit shqiptar, ka gëzuar shumë të gjithë shqiptarët si dhe përbën ngjarjen më të rëndësishme në kremtimet e 100vjetorit të Pavarësisë së Shqipërisë”. Përmes një deklarate për mediat, kryeministria njoftoi se “z. Berisha duke i uruar një mirëseardhje të përzemërt Sekretares së Shtetit Hillari Klinton në Shqipëri, thekson se kjo vizitë është dëshmi e marrëdhënieve të shkëlqyera që ekzistojnë midis dy vendeve dhe kombeve tona, ndjenjave të ngrohta e miqësore dhe respektit që Sekretarja Clinton dhe Qeveria e Shteteve të Bashkuara ushqejnë për shqiptarët si dhe mbështetjes së çmuar që i kanë dhënë dhe i japin në mënyrë të vazhdueshme Shqipërisë dhe kombit shqiptar në përpjekjet për ndërtimin e demokracisë së bazuar në vlerat e tregut”. Kryeministri Berisha thekson se vizita e Sekretares Klinton në kuadrin e 100- vjetorit të Pavarësisë së Shqipërisë, “është një nder i madh, por dhe një rast i veçantë për qytetarët dhe autoritetet e vendit tonë”. Kjo sipas tij “për të shprehur edhe njëherë mirënjohjen më të thellë ndaj mbështetjes së jashtëzakonshme dhe rolit kryesor që SHBA kanë luajtur këto 100 vite në përpjekjet e shqiptarëve për liri, dinjitet kombëtar dhe për integrim në institucionet euro- atlantike dhe evropiane”. Në vizitën që zhvilloi pak muaj më parë në SHBA, Kryeministri Sali Berisha gjatë takimit në Departamentin e Shtetit, ka marrë garancinë e kryediplomates amerikane Hilari Klinton për realizimin e një vizite zyrtare në Shqipëri. Pas takimit që ka zgjatur përreth 40 minuta, zyra e Kryeministrit konfirmoi se ftesës së ripërsëritur gjatë bisedës, Hilari Klinton i është përgjigjur pozitivisht dhe i ka premtuar Kryeministrit Berisha se do të jetë në Shqipëri për festimet e 100- vjetorit të themelimit të shtetit shqiptar. Para dy ditësh, Departamenti Amerikan i Shtetit njoftoi se Sekretarja e shtetit Hillari Klinton do të vizitojë javën e ardhshme Shqipërinë në kuadër të turit që do të zhvillojë në rajonin e Ballkanit. “Sekretarja Klinton do të theksojë solidaritetin me Shqipërinë, aleate e NATO- s dhe do të marrë pjesë në kremtimet e 100- vjetorit të Pavarësisë së Shqipërisë me një fjalim në Parlament. Sekretarja Klinton do të vërë theksin tek nevoja e bashkëpunimit më të fuqishëm politik dhe vendosjen e sundimit të ligjit”, thuhet në njoftimin e DASH. Në turin e saj ballkanik, Sekretarja amerikane e Shtetit, Klinton do të vizitojë edhe Bosnjën, Serbinë dhe Kosovën.