Hipotekat: 26 shërbime të reja me pagesë

Dyfishohet, duke shkuar në 51 numri i veprimeve që paguhen në zyrat e regjistrimit të pasurive Udhëzimi i Qeverisë: Tabela e re e tarifave për ZRPP- të

Ndryshimet të cilave u është nënshtruar legjislacioni për regjistrimin e pasurive të paluajtshme, veçanërisht, kalimi i procedurave në zyrat noteriale, ka bërë që numri i shërbimeve me pagesë për veprimet me pronat të dyfishohet nga 25 në 51. Në udhëzimin e Këshillit të Ministrave, përmes të cilit përcaktohen tarifat për shërbimet e ofruara nga Zyra e Regjistrimit të Pasurive të Paluajtshme, vërehen një seri shërbimesh të reja me pagesë, të cilat nuk ekzistonin në tabelën e mëparshme të tarifave. Në tabelën e re të çmimeve specifikohen një seri shërbimesh me pagesë, të cilat nuk ekzistonin në tabelën e miratuar nga qeveria në vitin 2011. Kështu, shërbimi “Regjistrimi i akteve noteriale që lidhet ndërmjet zhvilluesve të pronës dhe pronarëve të truallit, apo me subjekte të treta” kushton 3,500 lekë. Po kaq kushton edhe shërbimi i regjistrimit të kalimit të pronësisë me anë të ligjit, me vendim të gjykatës apo të një akti administrativ. 3,500 lekë kushton edhe shërbimi i regjistrimit të aktit të kalimit të pronësisë nga përmbaruesi gjyqësor, ashtu si dhe regjistrimi i akteve me të cilat krijohet një shoqëri apo një subjekt tjetër i së drejtës, që ka në pronësi pasuri të paluajtshme, apo gëzon të drejta të tjera reale.

TABELA E ÇMIMEVE

Ndër shërbimet e reja të shfaqura rishtas në tabelë rezultojnë veprimet që kanë të bëjnë me konsultimin e hartës dixhitale, apo regjistrit elektronik të pasurive të paluajtshme, tek e cila gëzon akses çdo zyrë noteriale. Kështu, ofrohet me tarifën 700 lekë shërbimi i konsultimit të kartelës së pasurisë dhe të dhënave të tjera të pasurisë së paluajtshme. Verifikimi online i gjendjes juridike të pasurisë në regjistrin elektronik të pasurive të paluajtshme kushton 600 lekë, ndërkohë dhënia e informa- cionit zyrtar për një pasuri të paluajtshme ndaj individëve apo institucioneve kushton 700 lekë. Nga 900 lekë kushton shërbimi për regjistrimin e vendimit gjyqësor për vendosjen e masës së sigurimit të padisë, regjistrimi i kërkesës së padisë, regjistrimi i aktit noterial për pezullimin e veprimeve të regjistrimit, regjistrimi ( ndryshimi apo shuarja) e servitutit, regjistrimi i kontratës së shitjes, kontratës së shërbimit dhe kontratës së dhurimit me rezervë/ kusht të pasurisë, regjistrimi i të drejtës së parablerjes dhe regjistrimi i prokurës. Regjistrimi i kontratave të hipotekimit për garantimin e kredisë kushton 25 mijë lekë për kreditë mbi 10 milionë lekë. Për kreditë nga 1 deri në 10 milionë lekë paguhet tarifë 15 mijë lekë, ndërsa për kreditë në vlerën deri në 1 milion lekë, tarifa që paguhet është 7.500 lekë.