PS: Anulimi i tenderit të interkonjeksionit, absurd
Gaçi: Ripërsëritja e garës do t’i shtonte kostot me 15 milionë dollarë “Qëndrim i qartë antikombëtar i qeverisë”
Për Partinë Socialiste, anulimi i tenderit për ndërtimin e linjës së interkonjeksionit ShqipëriKosovë kalon përtej kufijve të absurdes, jo vetëm për prishjen e marrëdhënieve me partnerët gjermanë, por edhe pasi një vendim i tillë e rrit me 15 milionë dollarë koston e këtij projekti energjitik. Në një intervistë të djeshme, deputeti socialist Artan Gaçi tha se është e papranueshme që qeveria vendos arbitrarisht anulimin rezultatit të tenderit, rregullat e të cilit janë përcaktuar nga KfW, banka Gjermane që financon projektin. “Këtu është një absurd tjetër. Nëse kriteret janë vendosur nga banka gjermane, fituesi ka dalë si rezultat i atyre kritereve të shpallura nga banka, ripërsëritja e tenderit me të njëjtat kushte, po të bankës gjermane, do të nxirrte po të njëjtët fitues me po të njëjtat kritere, por me një ndryshim të madh”, tha Gaçi lidhur me vendimin e Qeverisë shqiptare, që kërkon të shpallë fituese kompaninë e kualifikuar në vendin e dytë në tender.
TENDERI
Tenderi për linjën Shqipëri- Kosovë është zhvillu- ar në fillim të vitit të shkuar dhe u fitua nga kompania kroate “Dalekovod”. Përfundimi i garës nuk u pranua nga Qeveria shqiptare, e cila kërkon kualifikimin si fituese të firmës që u rendit e dyta me justifikimin se çmimi i ofruar nga ajo është shumë më i lirë. Një lëvizje e tillë u hodh poshtë nga gjermanët, të cilët u japin rëndësi parësore garancive teknike që ofron firma fituese. Qeveria shqiptare e ka argumentuar anulimin e tenderit për linjën Shqipëri- Kosovë me justifikim se oferta e renditur e dyta është 8 milionë dollarë më e lirë se fituesja. Kërkesën e shtetit shqiptar për anulimin e tenderit, sipas Gaçit, e bëjnë edhe më absurde kostot financiare shtesë që do të sillte ky vendim. “Pra, është absurd argumenti i vetëm i qeverisë që thotë se fituesi i vendit të parë ka çmim më të lartë sesa vendi i dytë. Edhe ky absurd bie sepse tenderimi, sipas llogarive të bankës gjermane, mund ta rritë koston me 15 milionë euro”, tha Gaçi.
Ndërkohë që për Gaçin, ky anulim përbën një qëndrim të qartë antikombëtar të qeverisë Berisha, pasi shkakton kosto për konsumatorët shqiptarë dhe palën kosovare. Sipas Gaçit, përfituesit e vetëm nga ky veprim janë kompanitë serbe që kanë edhe monopolin e transmetimit të energjisë. “Përgjegjësja kryesore për këtë dështim është vetëm Qeveria shqiptare. Është e humbur Kosova, është e humbur Shqipëria. Këtu ka vetëm një fitues. Fitues janë ata që kanë monopolin e linjave të transmetimit në Ballkan, pra që janë monopolistët e linjave të transmetimit serb”, deklaroi deputeti socialist. Gaçi shtoi më tej se, vendimi i bankës gjermane nuk mund të vihet në diskutim, ndërkohë ky veprim ka shkaktuar edhe një krisje në marrëdhëniet me Gjermaninë, ku duket edhe në notën e protestës që Qeveria gjermane i ka dërguar Ministrisë së Jashtme.