Bllokohet granti 120 mln lekë, “falimenton” bashkia
DURRËS/ Dako: Janë bllokuar investimet, Ujësjellësi në varësi të MPPT Shkak, borxhi 6 milionë euro i Ujësjellësit
BDURRËS llokimi i grantit prej 120 milionë lekësh nga qeveria për Bashkinë e Durrësit ka sjellë ngrirjen e investimeve të planifikuara për këtë vit në infrastrukturën rrugore në këtë qytet. Sipas kryebashkiakut Vangjush Dako, kjo bashki po përballet me një sërë vështirësish financiare, që vijnë si rezultat i rënies së të ardhurave nga biznesi i vogël, bllokimi i lejeve të ndërtimit dhe tashmë edhe bllokimi i grantit nga qeveria. Kjo ka bërë që 954 punonjës në varësi të bashkisë të marrin pagat me tri javë vonesë, duke përdorur fondin e të ardhurave vendore të planifikuar për investimet në infrastrukturë. Bllokimi i grantit prej 120 milionë lekësh është bërë me arsyen se Ndërmarrja e Ujësjellësit në Durrës ka detyrime me vlerë rreth 6 milionë euro ndaj kompanisë CEZ. Në një prononcim për “Gazetën Shqiptare”, kryebashkiaku Dako deklaron se ky bllokim bëhet për motive politike, pasi Bashkia e Durrësit është e vetmja në vend që s’ka asnjë aksion tek Ujësjellësi. Për këtë gjë, që më 10 tetor i është dërguar një peticion Ministrisë së Financave, Kryeministrit, Ministrisë së Punëve Publike e Transportit, për të rishikuar vendimin i cili po mban peng investimet në Durrës.
INVESTIMET
“Bashkia e Durrësit gjatë nëntë muajve të këtij viti po përballet edhe me një rënie të ardhurash nga biznesi i vogël në masën 30%, nga çfarë ishte parashikuar në fillim të vitit. Ndërsa situatën e ka përkeqësuar edhe më tej mungesa e të ardhurave nga taksa e ndërtimit në infrastrukturë, të planifikuara në vlerën 400 milionë lekë e të mbledhura në masën 100 milionë lekë, për shkak të bllokimit të lejeve të ndërtimit që prej shtatorit të vitit të shkuar, kohë kur është shkrirë KRRT- ja e bashkisë”, ka thënë për GSH, kreu i Bashkisë së Durrësit. Sipas tij, të gjitha investimet e plani- fikuara në infrastrukturë janë bllokuar, duke nisur nga qendra e qytetit: sheshi “Liria” faza e dytë, vijimi i investimit në shëtitoren “Taulantia”, ndërtimi i rrugës së brendshme në plazh që nis nga posta deri në unazë, ndërtimi i rrugëve në lagjen numër 7, në lagjen numër 8, investime të parashikuara
këto në buxhetin e vitit 2012.
AKUZA
Kryebashkiaku deklaron se bllokimi i grantit të qeverisë është krejtësisht për motive politike, duke argumentuar faktin se Bashkia e Durrësit nuk ka aksione tek Ujësjellësi. “Bashkia e Durrësit është e vetmja në republikë, e cila nuk e ka marrë në menaxhim Ndërmarrjen e Ujësjellësit, ajo varet drejtpërdrejt nga Ministria e Punëve Publike dhe Transporti. Është absurd fakti i bllokimit të grantit, për shkak se Ujësjellësi, një ndërmarrje ku bashkia nuk ka asnjë aksion, ka borxhe”, është shprehur Dako. Më tej ai shton se Ujësjellësi kalon në 14 njësi vendore të qarkut dhe asnjë nga njësitë nuk e ka në varësi. Ndërkohë që Dako shprehet se, prej 10 tetorit i është dërguar një peticion Ministrisë së Financave, Kryeministrit Sali Berisha, Ministrisë së Punëve Publike e Transportit, për të rishikuar vendimin i cili po mban peng investimet, por deri tani nuk ka kthim përgjigjeje. Sipas kryebashkiakut, për çdo vit kjo bashki paguan nga 70 milionë lekë fatura të energjisë elektrike dhe nuk ka asnjë detyrim të mbetur.