Banorët e Nënshkodrës: Prej 2 vjetësh qeveria mashtron me dëmshpërblimet
“Pas përmbytjeve, jemi mbytur në borxhe”
SHKODËR - Familjet e përmbytura në Shkodër që në vitin 2010, protestojnë për të disatën herë radhazi për të marrë dëmshpërblimet për dëmet e shkaktuara në shtëpitë dhe pronat e tyre. Ata shprehen se për 2 vjet me radhë janë mashtruar se do të paguhen, por ende nuk kanë marrë përgjigje për problemin e tyre. “A duhet të japë kush llogari për gënjeshtrat që na thuhen për 2 vite me radhë?”, pyesin banorët e Nënshkodrës në retorikë. Së fundi familjet e prekura i kanë dërguar letër Kryeministrit, me shpresën se do marrin një përgjigje pozitive, në të kundërt ata thonë se do ndërmarrin aksione deri në plotësimin e kërkesës. Komuna Ana e Malit ka qenë një nga zonat më të dëmtuara si pasojë e përmbytjeve në dy dimrat e kaluar. Janë dëmtuar shtëpitë, bagëtitë e të mbjellat dhe për rikuperimin e tyre banorët janë detyruar të marrin borxhe e kredi, duke shpresuar se me daljen e dëmshpërblimeve do t’i shlyejnë. “Ne si komunitet i kemi dërguar një shkresë Kryeministrit Sali Berisha, ku i kemi sqaruar të gjithë vuajtjet e problemet tona dhe jemi në pritje të një reagimi pozitiv”, thotë Ademi, një nga kryefamiljarët që kanë marrë iniciativën për të kërkuar zgjidhje nga Kryeministri. Familjet Marku në zonën e Obotit, sipas njërit prej kryefamiljarëve, janë përmbytur disa herë, por nuk kanë marrë në asnjë rast dëmshpërblim. “Unë së bashku me familjet e tre vëllezërve jemi përmbytur pesë herë. Na kanë ngordhur bagëtitë, na është dëmtuar baza ushqimore, të mbjellat, orenditë e shtëpisë. Gjithçka është shkatërruar”, thotë Viktor Marku, një nga banorët e Anës së Malit, që përmbyt- jet i kanë marrë pothuajse gjithçka. Mbi 2 miliardë lekë është shifra e llogaritur për t’iu dhënë familjeve të përmbytura, ndërkohë që janë shumë pak banorët që kanë përfituar. br. shll.