Avramopulos, Berishës: Shih 100 vjet para dhe jo 100 pas
Ministri i Jashtëm i Greqisë, apel publik kryeministrit shqiptar " Ne politikanët mendojmë për të ardhmen"
Me anë të një apeli publik të shkurtër por të qartë, e pa doza diplomacie, ministri i Punëve të Jashtme të Greqisë, Dimitris Avramopulos i sugjeroi dje kryeministrit të Shqipërisë, Sali Berisha se " liderët politikë nuk duhet të mendojnë dhe të flasin duke parë 100 vjet prapa por duhet të shohin 100 vjet përpara". Ky qëndrim zyrtar i Athinës, i publikuar në faqen zyrtare në internet të ministrisë së Jashtme greke, është i disati në harkun kohor të 72 orëve të fundit, ç'ka reflekton një rritje të ndjeshme të tensionit në marrëdhëniet dypalëshe shqiptarogreke. Gjithçka filloi mbrëmjen e 27 Nëntorit, kur kryeministri, Sali Berisha, në fjalën e mbajtur në qytetin e Vlorës, me rastin e 100- vjetorit të Pavarësisë së Shqipërisë deklaroi mes të tjerash se Preveza është tokë shqiptare. " Gëzuar Vlorës, qytetarëve të saj, Ismail Qemal Vlorës e burrave të tjerë të kombit, që shpallën në këtë qytet të përjetshëm, në 28 nëntor të vitit 1912, Pavarësinë e Shqipërisë, Pavarësinë e Shqipërisë etnike, Shqipërisë së të gjitha trojeve shqiptare nga Preveza në Preshevë, nga Shkupi në Podgoricë. Nder përjetë babait të Pavarësisë së Shqipërisë Ismail Qemal Vlorës, burrave që firmosën aktin e Pavarësisë, qytetarëve të Vlorës e të mbarë Shqipërisë! Gëzuar 100- vjetorin!", - u shpreh Berisha. I menjëhershëm dhe tepër i ashpër ka qenë reagimi i palës greke. Ministri i Punëve të Jashtme, Dimitris Avramopulos anuloi vizitën e planifikuar në Tiranë me rastin e 100- vjetorit të Pavarësisë së Shqipërisë. Në njoftimin zyrtar të MPJsë greke thuhej mes të tjerash se " deklarata të tilla nuk kontribuojnë në krijimin e një klime miqësie, besimi dhe fqinjësie të mirë mes dy vendeve dhe zhvillimin e nismave të përbashkëta në sektorët politikë, ekonomikë". Ndërkohë që ushtarët grekë, të ftuar për të parakaluar me kuadratin e përcaktuar për flamurtarët e vendeve të NATO- s bojkotuan zyrtarisht paradën e Forcave të Armatosura shqiptare. Në lidhje më anulimin e vizitës së minis- trit grek Avramopulos reagoi edhe shefi i qeverisë shqiptare, përmes zëdhënëses së tij Erla Mëhilli. E pyetur mbi deklaratën e bërë nga Kryeministri Berisha në Vlorë, në të cilën u citua Preveza, Mëhilli theksoi se " deklarata e Kryeministrit i referohet kontekstit historik të 100 viteve më parë dhe nuk shpreh asnjë pretendim territorial ndaj fqinjëve tanë të Jugut, Veriut apo Lindjes". Ky qëndrim do të rikonfirmohej një ditë më vonë edhe nga vetë kryeministri Berisha, dek- laratat e të cilit u mbështetën ndërkohë nga Presidenti i Republikës, Bujar Nishani si dhe nga opozita shqiptare, që nëpërmjet deputetit socialist, Pandeli Majko konfirmoi se për Prevezën, klasa politike shqiptare nuk ka dallime.