AURON TARE: KULLA ARTISTIKE VROJTIMI NË BREGDET
Shtatë
plazhe të Shqipërisë, Velipoja, Durrësi, Golemi, Orikumi, Vlora, Saran da dhe Dhërmiu, sivjet do të kenë kulla vrojtimi. Jo vetëm kaq: kullat do të jenë edhe një formë arti që i shkon përshtat zonës. Lajmi u bë i ditur dje nga drejtori i Agjencisë Kombëtare të Bregdetit, Auron Tare, i cili sqaroi se institucioni që ai drejton ka shpallur një konkurs për përzgjedhjen e modeleve më të mira të kullave. " Gjëja kryesore që ne duam të bëjmë këtë sezon është adresimi i çështjes së sigurisë përgjatë bregut detar. Për këtë arsye, mbasi kemi parë me kujdes se çfarë nuk ka funksionuar deri tani edhe pse ka pasur një kuadër të mirë ligjor, ka qenë mossiguria në det. Vendosëm që para këtij sezoni, të bëhet përzgjedhja e shtatë plazhevepilot, nga veriu në jug, ku të mundohemi të vendosim standardet ' blue flag' për mbarëvajtjen e shërbimeve në plazhe", - u shpreh drejtori i AKB- së për mediat. Sipas Tares, prej këtij viti do fillojë raportimi për publikun i cilësisë së ujit, rërës, shërbimit, por gjëja kryesore mbetet vendosja e kullave të vrojtimit dhe krijimi i rojeve bregdetare. Ai vëren se kjo është hera e parë që nisma merr jetë në rajonin tonë, duke e avancuar konceptin e kullave, jo thjesht si kulla vrojtimi, por edhe si forma arti. Plazhet e përzgjedhura dhe ato që do të përzgjidhen më vonë të identifikohen me këtë lloj kulle ose kullat të identifikohen me plazhin, duke marrë parasysh kulturën, traditën, ambientin etj. " Menduam ta hapnim këtë koncept me ndihmën e studentëve të Arkitekturës në Shqipëri e Kosovë, pasi kontaktuam fakultetet. Rreth 80 studentë kanë punuar në grupe të ndryshme për mbi 3 javë për të sjellë sot 30 modele kullash që vijnë si forma arti. Studentëve iu kërkuam që kullat të mos shihen vetëm si mjet pune, por edhe si vepra arti", - tha Tare para mediave. Juria përbëhet nga Gjon Radovani, Mark Muhler, Iris Sala, Alban Muja dhe Gjergj Poçi. Nga faza e parë e konkurrimit të këtyre projekteve do të zgjidhen 14 të tilla, që do të kalojnë në fazën e dytë, ndërsa në të tretën do zgjidhen 7 projektet- kulla fituese. Skuadra fituese do e ndërtojë vetë veprën që e ka projektuar. " Gjatë këtij procesi studentët janë shfaqur të interesuar për t'u angazhuar në çështjet e bregdetit. Ndaj menduam që me këta të krijojmë një lloj klubi studentësh të Arkitekturës që do të angazhohen më tej në projekte të ndryshme dhe të krijohet bashkëpunim me ta", - thotë Tare. Sipas tij, do të trajtohen në Mal të Zi 35 roje bregdetare, që më tej certifikohen me " ILSE" e që do punojnë për Agjencinë Kombëtare të Bregdetit në muajt maj- shtator. Për këtë çështje, dje ka folur në Durrës edhe ministrja e Zhvillimit Urban dhe Turizmit, Eglantina Gjermeni. Ajo deklaroi se " me urdhër të kryeministrit është ngritur Task- Forca e Menaxhimit Turistik Veror, e cila do të jetë përgjegjëse për ndjekjen dhe zbatimin e masave që do të garantojnë standarde, siguri dhe rritjen e cilësisë së shërbimeve".