Vllaznia thuajse shpëton, sot me sy e veshë në Korçë
Shkodranët e shohin veten të pestët në renditje pas fitores në Krujë Një javë kyçe për Europën dhe mbijetesën
Poker" golash për tri pikë të arta mbijetese. Ky është produkti i Vllaznisë në transfertën krutane, në ndeshjen hapëse të javës së 29- të të Superiores, ku regjistroi fitoren e pestë radhazi nën drejtimin e Dervish Haxhiosmanoviçit. Sukses që vjen pas 6 vitesh " agjërim" në stadiumin e Krujës, ku skuadra vendëse u dëshmua e pashpresë dhe pranoi rënien një kategori më poshtë. Pas javës së 29të, kuqeblutë e shohin veten në kuotën e 41 pikëve, aq sa ka edhe Laçi i vendit të gjashtë, që do të luajë sot ndaj durrsakëve. Bylisi, Lushnja dhe Kastrioti e kanë marrë tashmë rrugën për andej, ndërsa beteja për emrin e katërt përfshin disa skuadra, ku natyrisht, pas fitores së Vllaznisë, shkodranët janë të fundit që rrezikojnë.
Po të shohësh rezultatin e djeshëm në Krujë, të duket se gjithçka ka qenë e lehtë për shkodranët. Me gjithë reshjet e shiut, formacioni shkodran ka vuajtur jo pak për fitoren, ose më saktë për të administruar avantazhin, pasi gjatë gjithë kohës miqtë kanë qenë në avantazh, duke filluar nga minuta e tetë e ndeshjes, kur Kruja shënon golin e parë. Por në minutën e 22- të Doku do të barazonte shifrat në 1- 1 dhe në fundin e pjesës së parë Tafili i jep sërish epërsinë Vllaznisë. Shifrat shkojnë në 1- 3 në minutën e 58- të, kur Shtubina realizon një tjetër gol të bukur. Kastrioti nuk dorëzohet, me anë të një 11metërshi shkurton distancën në 2- 3 dhe ndeshja hapet sërish. Por praktikisht takimin do ta mbyllte malazezi Bushiç, kur shënon golin e katërt dhe të sigurisë. Një gol që vlen edhe për sulmuesin shkodran, pasi kishte disa javë që nuk po shënonte. Tashmë Vllaznia me këtë entuziazëm, përderisa matematika e lejon, mund të luftojë edhe për një vend në Europë, por në kampin shkodran nuk e mendojnë shumë këtë. Kjo javë është shumë e rëndësishme, sidomos sa i përket ndeshjes Skënderbeu- Besa, e cila mund të ndajë përfundimisht fatin e titullit kampion dhe të rënies së skuadrës së katërt nga Superliga. Në Laç luhet fati i pjesëmarrjes në Europë.
Beteja më e fortë duket se do të zhvillohet për zonën europiane, ndërsa e rihapur është deri diku edhe lufta për titullin kampion. Skënderbeu është tashmë vetëm 5 pikë për- para Kukësit, pas disfatave radhazi të ndeshjeve të fundit, çka ka bërë që verilindorët e Starovës të ushtrojnë presion dhe të pretendojnë ndonjë mrekulli. Sidoqoftë, kjo javë i jep një përgjigje kësaj pikëpyetjeje të ringritur rishtazi, sepse korçarët kanë në dorë të vulosin titullin me një sukses ndaj Besës, por edhe t'u japin goditjen fatale për një kategori më poshtë kavajasve. Gjithçka e tillë është e lidhur drejtpërdrejt me këtë duel. Partizani luan para tifozëve të vet kundër Kukësit dhe duhet të marrin patjetër 3 pikët, që të mbeten pjesë e pretendimeve europiane. Përplasje direkte për zonën europiane është edhe ajo mes Laçit e Teutës. Flamurtari është me fat në këtë " stacion" të garës, sepse luan në " Roza Haxhiu". Ky stadium dikur ishte " tmerr" për çdo kundërshtar, por tashmë historia e fazës së parë duket e largët. Lushnja e ka ngritur " flamurin e bardhë", teksa e sheh veten të kthyer andej nga erdhi. Një trepikësh i kuqezinjve në këtë transfertë u jep atyre sigurinë e nevojshme për mbijetesën.