Vasili: LSI e Meta nuk kanë vënë asnjëherë kushtëzime pushteti ndaj Ramës e PS
"Koalicioni, më i vogël se reforma shtetformuese e ' Drejtësisë'" Replikë Majkos: Ja pse je i painformuar
Lëvizja Socialiste për Integrim pohoi dje nëpërmjet kreut të grupit të saj parlamentar, Petrit Vasili, se i ka qëndruar gjithnjë korrekte kolacionit qeverisës me Partinë Socialiste dhe se nuk ka vënë asnjëherë kushte apo kushtëzime pushteti ndaj Edi Ramës. Në përgjigje të interesimit të gazetarëve lidhur me prononcimin e deputetit të PS- së, Pandeli Majko, i cili dy ditë më parë pretendoi ekzistencën e problemeve brenda aleancës, Vasili u shpreh se nuk ka asnjë keqkuptim për reformën në drejtësi lidhur me qëndrimin e LSIsë. Sipas tij qëndrimi i kreut të Kuvendit, Ilir Meta dhe i LSI- së ka qenë i palëvizshëm për të pasur një reformë në drejtësi sipas standardeve të "Venecias" dhe me konsensus. "Nuk ka asnjë keqkuptim për reformën në drejtësi lidhur me qëndrimin e LSIsë dhe z. Meta. Jam i bindur që z. Majko nuk është i informuar, që në tavolinat e nivelit të lartë të koalicionit që nga dita e parë kur kjo reformë filloi të hartohej edhe deri në miratimin e saj në mesnatën e 21- 22 korrikut, qëndrimi i z. Meta dhe i LSI- së ka qenë i palëvizshëm për të pasur një reformë në drejtësi sipas standardeve të ' Venecias' dhe me konsensus. Ky qëndrim i z. Meta nuk ka lëvizur asnjë presje edhe në çdo takim me përfaqësuesit më të lartë ndërkombëtarë", - deklaroi Vasili. Sipas tij "LSI ka qenë një forcë shumë korrekte në raportet e saj me koalicionin dhe ky qëndrim ka qenë i qartë edhe në tavolinat e nivelit më të lartë të koalicionit. LSI dhe Ilir Meta nuk kanë vënë asnjëherë kushte apo kushtëzime pushteti ndaj Edi Ramës dhe PS- së. Por ka pasur vetëm një kusht, që është vendosur nga LSI për PSnë para zgjedhjeve të vitit 2013 dhe ai ishte që PS, në opozitë në atë kohë, të votonte tre ligjet që ishin detyrim i integrimit evropian. Gjithashtu, kujtoj se edhe koalicioni me PD- në në vitin 2009, i cili u krijua, pas përjashtimit nga PS të çdo mundësie të bashkëpunim- it politike me LSI- në, u krijua vetëm me një qëllim për të siguruar stabilitetin e vendit dhe për të bërë liberalizimin e vizave për të gjithë shqiptarët", - theksoi kreu i grupit parlamentar të LSI- së. Mandej Vasili deklaroi se "besoj akoma që z. Majko bën pjesë në atë plejadë socialistësh që nuk e kanë harruar kredon: të sakrifikojmë pushtet për të bërë shtet. Pikërisht për këtë arsye konsensusi i realizuar mesnatën e 21- 22 korrikut ishte prova e bindjes tonë se duhet bërë një shtet i fortë dhe që e besojnë të gjithë shqiptarët. Në funksion të realizimit të këtij konsensusi që 100% e shqiptarëve duan, ka qenë edhe komunikimi me PDnë si forca kryesore e opozitës, por besoj se Pandi më shumë se kushdo tjetër socialist në kuptimin më të mirë të fjalës ka qenë një ' fanar ndriçues' në këtë drejtim, pasi ai vetë e ka cilësuar të domosdoshëm këtë edhe kur komunikonte me Berishën e parë, ashtu edhe me Bashën e fundit për Asamblenë e NATO- s që u mbajt në Tiranë. Unë e vërej të qartë mosinformimin që Pandi ka për çështjet e koalicionit megjithëse sinqerisht koalicioni ynë më duket i vogël në raport me këtë arritje shtetformuese, që u realizua mesnatën e 21- 22 korrikut dhe që shtron rrugën e vendit për 30 vitet që vijnë. Megjithatë, deklarimi i z. Meta dhe gatishmëria e plotë për të komunikuar në çdo nivel qoftë edhe të grupeve parlamentare për çështje të koalicionit besoj që e shteron edhe këtë merak të mikut tim, Majko ku theksoj edhe një herë se korrektesa e LSI- së në bashkëpunimin e saj politik do jetë e pandryshuar sikurse dhe gatishmëria për të dëgjuar çdo shqetësim që Majko apo kushdo tjetër mund të ketë", - përfundoi kreu i grupit parlamentar të LSI- së, Petrit Vasili.