Gjobë për lyerje kazanësh, Klodjan Leka: Si lindi ideja
Bashkiakët i gjobitën me 30 mijë lekë për prishje të pronës publike Aktivisti: Koshave u vumë emrin që meritojnë
Në orët e para të mëngjesit të së premtes, gjatë aksionit të Organizatës Politike për të shkruar në kazanët e plehrave emrat e 63 deputetëve që miratuan ligjin për importimin e plehrave, u arrestuan dy aktivistët Klodjan Leka dhe Bislim Lakna. Sipas njoftimit të organizatës, dy aktivistët janë gjobitur nga policia bashkiake me 30 mijë lekë. "Në ambientet e komisariatit është paraqitur edhe policia bashkiake, e cila u ka vënë një gjobë të dyfishtë aktivistëve: për prishje të pronës publike të bashkisë. Gjoba e kripur e bashkiakëve prej 300 mijë lekësh të vjetër, për faktin se kazanëve të plehrave u është vënë emri që meritojnë", theksohet në njoftimin e Organizatës Politike. Në një intervistë për "Balkanweb", Klodjan Leka rrëfen 7 orët e ndalimit të tij në qelinë e paraburgimit dhe deklaron se nuk do të heqë dorë nga protesta për të mos pranuar ligjin e mbetjeve urbane.
Klodi, kur u ndaluat nga policia?
Ne u ndaluam në rrugën "Myslym Shyri" rreth orës 3 të mëngjesit. Një makinë e vogël "Polo" dhe një furgon policie zunë rrugën ku po ecnim, ndërsa një motor sportiv priste në rrugicën prej nga mund të ikje dhe që prangosi bashkaktivistin kur ky, në panik e sipër, tentoi t'i shpëtonte arrestimit. Pra, me pak fjalë, kishin mbyllur të gjitha rrugët.
Sa orë qëndruat në komisariat?
Qëndruam nga ora 3 deri në orën 10, në një dhomë të ftohtë, me një stol të vetëm dhe ujë çezme. U përpoqëm të flinim ose të qetësoheshim disi, por ishte e pamundur. Ishim ' kriminelët' e vetëm në stacionin policor.
Si u soll policia me ju në ambientet e paraburgimit?
Ka dy lloje policësh: policët me përvojë, burra babaxhanë që përpiqen të kuptojnë idetë dhe dëshirat e brezit të ri, pasi janë prindër të bashkëmoshatarëve tanë; dhe kaposhët e fryrë me klishe, që nuk besojnë se njeriu mund të besojë dhe që besojnë se uniforma u jep autoritet pothuajse pervers mbi të tjerët. Kërcëllitjet e dhëmbëve, fyerjet dhe sjelljet prej garipi janë realitet në komisariatet e policisë.
Përse e kundërshtoni ligjin për mbetjet?
Së pari, në kushtet kur qytetet tona kundërmojnë prej kërmës dhe institucio- net publike janë të paafta për të administruar edhe ato pak mbetje urbane, është marrëzi të pretendosh përpunimin e mbetjeve të botës në Shqipëri. Së dyti, imagjinoni ç'fatkeqësi mund të sjellë korruptimi i një doganieri, një inspektori, një mjedisori etj., nëse siç dyshohet, importohen mbetje të rrezikshme! Së treti, alternativa ekonomike dhe institucionale e qeverisësve për rimëkëmbje nuk duhet kërkuar te importimi i mbeturinave, te lëndët e kontaminuara, te kanabisi apo industritë e rrezikshme, sepse kjo alternativë nuk sjell asgjë të mirë, veçse më shumë të keqe.
Nga e morët shkakun për të shkruar emrat e politikanëve në kazanët e plehrave?
Ishte një ide që qarkulloi gjatë kohës që protestonim para parlamentit, por edhe domosdoshmëri, në kushtet kur pushteti qendror refuzon të dëgjojë kritikat dhe zërin tënd. Ne nuk kemi se ku të shprehemi tjetërkund, nuk kemi hapësirë tjetër lirie veç rrjetit social dhe mureve të qytetit. Po ashtu, ideja e të shkruarit të emrave të politikanëve nëpër kazanë mbeturinash, erdhi si rrjedhojë e hipokrizisë dhe tradhtisë së padurueshme të interesit publik dhe shoqërisë shqiptare.
A do i vazhdoni protestat?
Sigurisht që po! Njerëzit sikur e kanë humbur besimin te fuqia ndryshuese e protestës, por është i vetmi mjet demokratik që kemi, pavarësisht kufizimeve rreptësisht policore të saj kohëve të fundit. Njerëzit duhet të kuptojnë se bota nuk ndryshohet me një protestë të vetme. Nevojiten këmbëngulje dhe vazhdimësi. Presim të bashkohemi me organizata, personazhe publike dhe këdo që kërkon ndryshim, që të vendosim si dhe çfarë do të bëjmë në të ardhmen. "Balkanweb"