Bllokohet gomonia me 812 kg marijuanë, dy vetë në pranga
Mjeti u nis nga Orikumi në Vlorë
Një
operacion i përbashkët mes policisë shqiptare dhe asaj italiane ka bërë të mundur bllokimin e një gomoneje me rreth 812 kg marijuanë, ndërsa kanë përfunduar në pranga dy persona. Me anë të një njoftimi zyrtar mësohet se Policia e Vlorës në bashkëpunim me Policinë Kufitare, në afërsi të Orikumit kanë identifikuar dhe sekuestruar një mjet lundrimi të tipit gomone me dy motorë. Ndërkohë, nga ana e shërbimeve të Policisë Kufitare, në afërsi të vendit të quajtur "Kepi i Gjuhzës", u identifikua një mjet lundrues i paidentifikuar, i cili lëvizte në drejtim lindje- perëndim. Në ndjekje të tij u vunë shërbimet e Repartit Special "Delta" dhe të Njësisë së Guardia di Finanza në Vlorë, dhe njëkohësisht operacioni u koordinua me shërbimet e Guardia di Finanza të Barit. Gjatë orëve të para të mëngjesit të djeshëm, shërbimet e Guardia di Finanza, në afërsi të Leçes, kanë arritur të identifikojnë dhe të ndalojnë gomonen me motor 250 kuaj fuqi. Menjëherë pas ndalimit, policia arrestoi personat me iniciale D. A. dhe A. B., përkatësisht 36 dhe 38 vjeç, të dy nga qyteti i Vlorës. Po ashtu, uniformat blu sekuestruan edhe sasinë e lëndës narkotike, e cila ishte e ndarë në 30 pako. Aktualisht, policitë e të dyja vendeve janë duke punuar për identifikimin dhe vënien në pranga të personave të tjerë që janë të përfshirë në këtë veprimtari kriminale. Kujtojmë se të hënën u ndalua edhe një gomone tjetër në Bari, e cila ishte nisur nga Shqipëria, ku u bllokua sasia prej 682 kg drogë, ndërsa tre trafikantët mundën t'i shpëtonin policisë.