UMT kërkon 269 pedagogë të jashtëm
Ja kriteret e përgjithshme që duhet të plotësojnë kandidatët për personel akademik me kohë të pjesshme Afati i fundit për dorëzimin e dosjeve, 3 tetori 2016
Viti i ri akademik do të startojë në datën 20 tetor 2016. Për këtë arsye, Universiteti i Mjekësisë Tiranë, më datë 23 shtator ka shpallur konkurset për personel akademik me kohë të pjesshme në Fakultetin e Shkencave Mjekësore Teknike, përkatësisht në: Departamentin e Lëndëve Paraklinike, ku janë 98 vende të lira; Departamentin e Diagnostikës, Rehabilitimit Shëndetësor dhe Infermieristikës, në Kirurgji, Infermieristikë, në Obstetri- Gjinekologji, ku kërkohen 80 pedagogë me kohë të pjesshme, si dhe në Departamentin e Lëndëve Klinike dhe Infermieristikës së Përgjithshme, Infermierisë në Sëmundje të Brendshme, Pediatri, ku janë 91 vende të lira pune. Në total në këtë fakultet kërkohen 269 pedagogë të jashtëm. Sipas rektoratit të UMT- së, kandidatët kanë afat deri më 3 tetor për dorëzimin e dosjeve. Veç këtyre, UMT- ja në fillim të kësaj jave ka shpallur konkurset edhe për 70 vende vakante për personel akademik me kohë të pjesshme në Fakultetin e Mjekësisë Dentare, ku afati i dorëzimit të dosjeve është dita e diel, më 25 shtator.
KRITERET
Kriteret e përgjithshme për personel akademik me kohë të pjesshme: Të jetë diplomuar në programe të integruara ose Master Shkencor në degën përkatëse; Të ketë përfunduar studimet universitare me notë mesatare mbi 8; Të ketë eksperiencë pune jo më pak se 5 vite në specialitetin përkatës; Të zotërojë me dëshmi një gjuhë të huaj. Të mos jetë i dënuar me vendim të formës së prerë nga gjykata. Aplikantët për personel akademik me kohë të pjesshme preferohet të plotësojnë edhe këto kritere preferenciale: Të ketë doktoraturë në fushën përkatëse. Preferohen kandidatë që kanë gradë apo titull shkencor të fituar në universitetet publike ose universitete të njohura jashtë vendit; Të ketë eksperiencë pune; ( Preferohet punësimi pranë shërbimeve spitalore apo ambulatore.) Po ashtu preferohet të ketë eksperiencë në mësimdhënie në fushën përkatëse, publikime në revista shkencore, konferenca ose pjesëmarrje në kërkim shkencor në fushën përkatëse si dhe të ketë të mbrojtur me dëshmi gjuhën angleze.
DOKUMENTACIONI
Të gjithë kandidatët që dëshirojnë të bëhen pjesë e këtyre konkurseve për personel akademik me kohë të pjesshme pranë UMT- së, duhet të dorëzojnë dokumentet e nevojshme pranë zyrës së Burimeve Njerëzore në Fakultetin e Shkencave Mjekësore Teknike deri më datë 03.10.2016. "Kërkesë me shkrim drejtuar departamentit ku do të konkurrojë, Curriculum Vitae e detajuar me të gjithë aktivitetin sh- kencor dhe botues të kandidatit; Leje nga punëdhënësi në organizatën ose institucionin ku punon; Dokument identifikimi; Fotokopje të noterizuar të diplomës dhe listë së notave të të gjitha programeve të studimit ( Bachelor, Master Shkencor, Doktoraturë); Fotokopje të noterizuar të vërtetimit të ekuivalentimit të diplomës nga MAS- i, si diplomë, listë notash si dhe njohje të gradave për kandidatët që kanë studiuar jashtë shtetit; Kopje të noterizuara të dëshmive të gjuhëve të huaja të mbrojtura ( e detyrueshme të paktën një); Kopje të noterizuar të librezës së punës; Vërtetim page, shoqëruar me derdhjen e sigurimeve shoqërore nga qendra e punës; Dëshmi penaliteti; Dy referenca, nga të cilat të paktën njëra të jetë nga një profesor i fakultetit që është diplomuar ( dorëzohet vetëm nëse kandidati aplikon për herë të parë)", janë dokumentet që duhet të ketë dosja që do dorëzojë kandidati. Kandidatët që duan të garojnë për pedagogë të jashtëm në UMT, duhet të dorëzojnë brenda datës 3 tetor dosjen me dokumentet e përcaktuara në shkrim pranë zyrës së Burimeve Njerëzore në Fakultetin e Shkencave Mjekësore Teknike.