Bylykbashi: Jo financime nga privati Balla: Votat t'i numërojë shoqëria civile
OSBE thirrje partive politike: Bëni reformën elektorale, s'ka më kohë Kryetarja e KQZ- së, Luzi: "Filloni që sot reformën"
OSBE u bëri thirrje dje, partive politike të mbyllin sa më shpejt reformën zgjedhore. Ndërkohë që përfaqësues të dy partive të mëdha politike propozuan rregullime për funksionimin më të mirë të fushatës zgjedhore që po afron. Në një seminar për financimin e partive politike dhe të fushatave zgjedhore, të organizuar nga Këshilli i Evropës dhe Delegacioni i Bashkimit Evropian përfaqësuesi i PD- së, Oerd Bylykbashi kërkoi ndërhyrje edhe në Kodin Penal për të quajtur blerjen e votës jo krim zgjedhor, por korrupsion, i cili të mund të hetohet nga SPAK. Ndërsa Taulant Balla është për reduktim të shfaqjes bombastike të fushatës, që kalon deri në bezdisje. "Sa i takon disa propozimeve, si ai për depolitizimin e komisioneve të qendrave të votimit, ka ardhura koha që të flasim seriozisht. Vetë partitë votohen, e pastaj po vetë numërojnë votat. Kjo nuk është një gjë e mirë", tha Balla. "Po nuk u ndamë nga kjo praktikë, ne s'kemi për të pasur kurrë cilësi në zgjedhje. Partia Socialiste është totalisht për depolitizimin e komisioneve të Qendrave të Votimit. Ka mësues e Shoqëri Civile që mund ta marrin përsipër ta bëjnë këtë. Ka shumë argumente kundër financimit të partive vetëm nga buxheti i shtetit", u shpreh deputeti i PS. Ai kërkoi, gjithashtu, të rriten kompetencat e KQZ- së. Ndërsa Bylykbashi tha: "Nevojitet që partitë politike të mos financohet nga privati. Kjo për të shmangur përfshirjen e financuesve në poste të rëndësishme të adminis- tratës pas zgjedhjeve. Prandaj, nevojitet ndryshimi i Kodit Penal për donacionet e partive, duke lehtësuar kështu edhe punën e prokurorisë. Është e domosdoshme që partitë të faktojnë në detaje shpenzimet, të bëhet detyrim ligjor nga KQZ për të kostuar çdo aktivitet e material të bërë në kuadër të zgjedhjeve. Sanksionet të shkojnë te kryetari e kandidatët e jo thjesht te financieri i partisë. Të gjithë të mbajnë përgjegjësi nëse kanë falsifikuar shpenzimet, të cilat arrijnë deri në 2 milionë euro për kandidat në fushatën zgjedhore", tha Bylykbashi. Në këtë seminar, ishte e pranishme edhe kryetarja e KQZ- së. "Filloni që sot reformën. Nuk ka kohë për të përgatitur procesin", u shpreh Luzi. Ndërsa përfaqësuesja e Prezencës së OSBEsë, shefja e zyrës politike Carolina Ramos Da Costa u shpreh se; "Ka mbetur vetëm një muaj e gjysmë deri në fillimin zyrtar të përgatitjeve, mandati i komisionit të posaçëm të reformës zgjedhore skadon më 9 dhjetor dhe procesi i reformës zgjedhore nuk ka nisur ende. E thënë thjesht, nuk ka më kohë për të humbur!".