Studimi/ Ja 19 personat më të pasur në Shqipëri
Fondacioni për ' Liri Ekonomike' shpall listën e sipërmarrësve më të suksesshëm Në analizë kapitali aksioner, fitimi dhe kapitali
Fondacioni për ' Liri Ekonomike' shpalli dje rezultatet e studimit për listën e më të pasurve në Shqipëri për vitin kontabël që lamë pas. Me qëllim arritjen e konkluzioneve sa më të sakta, është zgjeruar baza e analizës nga ana sasiore, duke marrë në shqyrtim 60 individë, duke synuar në total 100 individë vitin e ardhshëm. Analiza është bazuar në të dhënat financiare zyrtare të deklaruara në institucionet shtetërore për 60 individët dhe kompanitë që ata zotërojnë, për pjesën takuese të gjithsecilit. Nga studimi i publikuar vërehet se ka 1 politikan që është në listë, ka 2 sipërmarrës të rinj që janë futur në top- 10, ka 3 sipërmarrës që nga lista e vjetshme kanë "fituar" pikë në renditje, duke u ngritur në nivele më lart dhe ka 4 sipërmarrës, renditja e të cilëve ka pësuar ulje nga vjet.
ANALIZA
Kriteret dhe parametrat e analizuara në këtë studim marrin në konsideratë këta tregues: kapitalin aksioner dhe pjesët takuese proporcionalisht, fitimin ( proporcional) të vitit ushtrimor dhe kapitalin neto proporcional. Duke ndjekur përvojën ndërkombëtare dhe orientimet përherë e më të spikatura të studimeve ekonomike, krahas zhvillimeve dhe dinamikave të tjera qoftë ligjore me impakt ekonomikofinanciar, qoftë në studimin e dinamikave të potencialeve të vendit, studimi i elitës së të superpasurve të Shqipërisë përbën jo vetëm interes shkencor dhe hulumtues ekonomik, por edhe përgjegjësi të veçantë në trajtimin e kujdesshëm të parametrave që do të ndërmerren në shqyrtim. Konkluzionet e nxjerra janë të rëndësishme si në zbulimin e tendencave vendëse, pavarë- sisht përmasave të shtetit, po ashtu edhe në përgjegjësinë që politikat dhe strategjitë kombëtare ndikojnë tek ripozicionimi i tyre dhe sidomos më pas, në impaktin që këto dinamika japin në efekt domino në ekonominë vendëse dhe indikatorët e ndryshëm ekonomikë.
Me qëllim arritjen e konkluzioneve sa më të sakta, përveç analizës cilësore, është zgjeruar baza e analizës nga ana sasiore, duke marrë në shqyrtim 60 individë. Studimi ka dalë në përfundimin se zgjerimi i spektrit të individëve është bërë me synimin e kuptimit më të thellë dhe më të plotë të asaj çka në vetvete ndodh në këtë segment- vlerë të ekonomisë vendëse. "Analiza është bazuar në të dhënat financiare zyrtare të deklaruara në institucionet shtetërore për 60 individët dhe kompanitë që ata zotërojnë, për pjesën takuese të gjithsecilit. Planifikimi i fondacionit për analizën e vitit të ardhshëm do të zgjerohet në të paktën 100 individë, me qëllimin zgjerimin e vazhdueshëm të bazës studimore dhe perceptimit përherë e më të lartë e më të detajuar të dinamikave të kësaj elite ekonomike vendase", thuhet në raport. "Vlen për t'u cituar se dy janë burimet e informacionit të përdorur në këtë analizë: deklarimet zyrtare në QKR si dhe përgjigjet individuale sipas një formulari të iniciuar dhe mbrojtur konfidencialisht. Qasja ka qenë e tillë, me qëllim minimizimin e marzhit të gabimit në përllogaritjet e renditjes dhe sidomos, përafrimit me sa më shumë realitetit, me synimin e reflektimit sa më të saktë jo vetëm të përfaqësimit nominal të këtyre individëve, por edhe të një renditjeje sa më racionale. Teksa janë marrë në shqyrtim të dhënat e depozituara zyrtarisht në QKR për të gjitha bizneset, duke ndarë dhe analizuar më vete secilin prej individëve me pjesët takuese në kapitalin pjesëmarrës për secilën kompani, për shumicën prej tyre janë përdorur edhe të dhënat e ofruara me iniciativë të lirë. Këto të dhëna janë mbledhur sipas një formulari të strukturuar me kujdes, me qëllim identifikimin edhe të atyre aseteve takuese që nuk janë detyrim i legjislacionit shqiptar. Këto asete janë pjesë e investimeve të ndryshme të patundshme dhe veprimtari ekonomike jashtë territorit të Shqipërisë", thuhet në raport.