Plagoset miku i ngushtë i Elton Çiços
Policia: Dyshimi, 29- vjeçari, i përfshirë në trafikun e drogës drejt Greqisë. Të afërmit: S'kishte konflikte Andi Mustafaraj sapo ishte ulur në lokal, në kërkim autorët
Një atentat me armë zjarri iu bë njërit prej shokëve më të ngushtë të Elton Çiços, i cili u vra më 1 maj të këtij viti në lokalin "De Niro", në Tiranë. E njëjta skenë krimi u përdor edhe mesditën e djeshme për 29- vjeçarin Andi Mustafaraj. Drejt këtij të fundit u qëllua me 3 plumba nga një person ende i paidentifikuar për policinë, ku dy prej plumbave e prekën në trup. Ngjarja e rëndë ndodhi rreth orës 12: 30 minuta, në verandën e lokalit "Merlin Monroe", në zonën e ish- ekspozitës "Shqipëria sot". Burime zyrtare të policisë bënë me dije se i riu është një ndër shokët e Elton Çiços, ndërsa pista kryesore e atentatit ndaj tij është ajo e hakmarrjes dhe përplasja mes bandave për shkak të konflikteve për trafikimin e drogës. Edhe pse lokali ku ndodhi ngjarja ishte vetëm pak metra larg Drejtorisë së Policisë Tiranës, për uniformat blu fillimisht ishte raportuar si një aksident rrugor. Të parët që mbërritën ishin oficerët e policisë rrugore, por më pas u konstatua se bëhej fjalë për një të plagosur me armë zjarri. I plagosuri ndodhet në Spitalin e Traumës, në gjendje të rëndë shëndetësore. Ai u transportua në spital me një makinë të rastit.
PLAGOSJA
I riu kishte vetëm pak minuta që ishte ulur në verandën e lokalit dhe kishte porositur një kafe dhe një ujë pa gaz, ndërsa makinëne etij e kishte parkuar para lokalit. Pikërisht në ato momente, autori ka shkuar drejt 29vjeçarit dhe ka qëlluar tri herë me armë drejt objektivit të tij. Pas kësaj, agresori është larguar në këmbë në drejtim të Bulevardit "Barjam Curri", ku dyshohet se e priste një makinë. Duke u nisur nga skena e krimit, burimet e policisë thanë se autorët e kanë ndjekur Mustafarajn me një makinë deri në momentin që ai është ulur në lokal. Me të mbërritur në vendin e ngjarjes, ekspertët e kriminalistikës nisën punën për identifikimin dhe vënien në pranga të autorëve, ndërsa sekuestruan edhe kamerat e lokalit ku ndodhi plagosja si dhe të disa bizneseve përreth. Në pyetje, policia mori edhe disa dëshmitarë okularë që ndodheshin në momentin e ngjarjes, ku disa prej tyre
kanë treguar se kanë parë një person të veshur me rroba të errëta dhe sapo qëlloi me armë, u largua menjëherë prej aty. Nga hetimet paraprake të oficerëve të policisë, mësohet se pista kryesore është ajo e një tentative vrasjeje, për shkak të përplasjes së dy bandave për konflikte droge. Sipas të njëjtave burimeve, bëhet me dije se Andi Mustafaraj nuk ka qenë një emër i padëgjuar për policinë, pasi për ta, ai njihej si një person i përfshirë në trafikun e drogës drejt Greqisë. Pas vrasjes së Çiços, për të cilin janë shpallur në kërkim dy autorët e dyshuar, Jani Alia dhe Renato Milloshi, policia dyshon se Andi Mustafaraj u kishte çuar fjalë atyre se do të hakmerrej për vrasjen e mikut të tij. Ky kërcënim dyshohet të jetë edhe arsyeja e tentativës për
vrasjen e 29- vjeçarit Andi Mustafaraj.
TË AFËRMIT
Duke pritur që operacioni i mikut të përfundonte me sukses, familjarët dhe miqtë e Mustafarajt ndodheshin para Spitalit të Traumës. Ata thanë për "Gazeta Shqiptare" se nuk kanë pasur dijeni të ndonjë konflikti që ai mund të ketë pasur me persona të tjerë. Gjithashtu, ata u shprehën se 29- vjeçari ishte baba i një fëmije dhe se nuk ishte një njeri problematik. Ndërsa njëri prej mjekëve të këtij spitali pohoi se i riu kishte marrë dy plumba. Një në shpatull dhe tjetrin në bark, që i kishte prekur edhe shpretkën. Sipas mjekut, gjendja e të plagosurit është e rënduar, pasi kishte humbur shumë gjak dhe se deri në orët e vona të pasdites ka marrë 6 qese me gjak. Me të mbërritur në vendin e ngjarjes, uniformat blu nisën punën për zbardhjen e plotë si dhe identifikimin dhe vënien në pranga të autorëve. Në cilësinë e provës materiale, policia sekuestroi në vendin ku u plagos 29- vjeçari Mustafaraj, 3 gëzhoja dhe 2 predha. Po ashtu, u sekuestruan edhe pamjet filmike të lokalit ku ndodhi krimi si dhe të disa bizneseve përreth.