Mbetjet, Idrizi: Vota kundër, çështja ka ndjeshmëri të lartë publike
Edhe pse PDIU- ja kundërshtoi dhe nuk votoi ligjin për menaxhimin e integruar të mbetjeve, shoqëria civile është takuar dje me kryetarin e kësaj force politike, Shpëtim Idrizi dhe kryetaren e grupit parlamentar, Mesila Doda, për t’u siguruar se vota e tyre do të jetë pro dekretit të presidentit për këtë ligj. Z. Idrizi vlerësoi rolin, aktivitetin dhe kauzat e shoqërisë civile. “Do të ishte totalisht e padrejtë dhe do të ishte shumë e rëndë për shoqërinë shqiptare në qoftë se shoqëria civile nuk do të reagonte. Ju jeni rasti që shoqëria civile jo vetëm që reagon, por ka edhe kapacitete, ka edhe njerëz të nderuar, ka profesionistë të nderuar”, - deklaroi z. Idrizi. PDIU- ja është shprehur kundër, ndërsa LSI- ja ka kërkuar kohë dhe po reflekton përpara se të marrë një vendim pro ose kundër, për dekretin e presidentit që riktheu për shqyrtim ligjin e mbetjeve.