Meta: Investimet rrisin prodhimin vendës

Viziton kompleksin blegtoral

Kreu

i Kuvendit, Ilir Meta dhe ministri i Bujqësisë vizituan dje një kompleks blegtoral në Libofshë të Fierit, të cilin e cilësuan model suksesi për zhvillimin e sektorit të bujqësisë dhe hapjen e vendeve të reja të punës. Ky kompleks ka zgjeruar aktivitetin së fundmi dhe ka aplikuar grandet e AZHBR- së në vlerën e 20 milionë lekëve. Teksa vlerësoi investimet e kësaj natyre, kreu i Kuvendit u shpreh se kjo formë sipërmarrjeje rrit prodhimin vendës. “Ferma të tilla janë rruga për një zhvillim të sigurt. Mjaft e suksesshme për zhvillimin e qëndrueshëm, po kështu edhe për rritjen e punësimit në mënyrë të sigurt dhe të qëndrueshme”, deklaroi z. Meta. Interesit të gazetarëve rreth akuzave të kryeministrit bërë pak ditë më parë nga Gjirokastra ndaj drejtorëve të Bujqësisë për mosmenaxhim të punës, Meta i ktheu këtë përgjigje. “Nuk është një pyetje për mua. Unë besoj se të gjithë duhet të bëjnë detyrën e tyre me përkushtim dhe me përgjegjësi. Në këtë drejtim jam i bindur se të vazhdohet për të rritur përgjegjësinë e secilit”, tha z. Meta. Nga kompleksi blegtoral në Libofshë të Fierit, Meta dhe Panariti u bënë thirrje fermerëve të ndërtojnë modele të tilla, për të përfituar nga fondet e shtetit për sektorin e bujqësisë.