Detyrimet e prapambetura, KLSH: S’rakordojnë shifrat, shkelja 81 mln lekë
Kontrolli i Lartë i Shtetit kontrollon Ministrinë e Financave për zbatimin e buxhetit Qeveria parashikoi për borxhet 903 milionë lekë më shumë
Shlyerja e detyrimeve të prapambetura ka qenë një nga zërat në të cilët është gjetur shkelje nga Kontrolli i Lartë i Shtetit gjatë auditimit të buxhetit faktik të vitit 2015. KLSH- ja bën të ditur se shifrat nuk korrespondojnë dhe shuma që diskordon është 903 milionë, e cila është diferenca midis planifikimit dhe buxhetit faktik. "Në raportin e buxhetit faktik që Ministria e Financave ka dorëzuar në Kuvend, nuk ka një raportim të saktë të detyrimeve të prapambetura. Treguesit fiskalë të konsoliduar paraqiten në vlerën prej 17,6 miliardë lekësh ( nga 18,5 miliardë lekë të planifikuara ose 903 milionë lekë më shumë), ndërkohë, tabelat ' Detajimi i alokimit të fondeve sipas Strategjisë së Shlyerjes së Detyrimeve të Prapambetura' e paraqesin vlerën e detyrimeve të prapambetura 81 milionë lekë më shumë nga raportimi në treguesit fiskalë të konsoliduar, ose në total 17,6 miliardë lekë", thuhet në raportin e KLSH- së, që mban firmën e kreut të këtij institucioni, Bujar Leskaj. KLSH- ja argumenton se shifra finale është 17.6 miliardë lekë, e cila është deklaruar dhe publikuar nga Ministria e Financave, por që nuk reflektohet në treguesit fiskalë të konsoliduar. "Nga sa më sipër konstatojmë se, diferenca prej 81 milionë lekësh vjen nga shtimi i zërit të ' detyrimeve të prapambetura' për 3 milionë lekë; shtimi i zërit të ' detyrimeve për kontrata për mallra dhe shërbime' prej 844 milionë lekësh; dhe pakësimi i zërit ' Të tjera' me 766 milionë lekë. Nga au- ditimi u konstatua se, situata ka mbetur e pazgjidhur, që do të thotë se, në treguesit fiskalë të konsoliduar vazhdon të reflektohet shuma prej 17,5 miliardë lekësh. Ky fakt të çon në përfundimin se pasqyra e treguesve fiskalë të konsoliduar nuk është e sak- të dhe ka nevojë për sistemime të mëtejshme sa i takon realizimit faktik të treguesve. Tabela e treguesve fiskalë të konsoliduar është produkti më i rëndësishëm, nga të dhënat e të cilit publiku pritet të marrë informacion rreth shpenzimeve dhe kostove publike. Raportimi jo i saktë dhe me gabime cenon besueshmërinë e këtij raporti dhe ofron informacion çorientues", thuhet në raport. KLSH- ja thotë se nga reflektimi i dy informacioneve të ndryshme për të njëjtin zë ( atë të shpenzimeve të prapambetura), nga dy burime të ndryshme brenda së njëjtës ministri ( Drejtoria e Thesarit dhe ajo e Detyrimeve të Prapambetura), tregon jo vetëm mungesën e bashkëpunimit dhe koordinimit, por edhe mungesë përgjegjshmërie, që cenon transparencën e informa-
cionit se si janë shpenzuar paratë e taksapaguesve.
REKOMANDIMI
Kontrolli i Lartë i Shtetit rekomandon të merren masa jo vetëm organizative, por edhe disiplinore, për të gjitha rastet kur cenohet saktësia e treguesve të buxhetit, në mënyrë që të konsolidohet një praktikë e mirë drejt një buxheti që reflekton një llogari të financave publike, të besueshme, gjithëpërfshirëse, korrekte dhe të kujdesshme, ku koordinimi dhe bashkëpunimi mes njësive të ndryshme merr rëndësi esenciale dhe emergjente,
në përputhje me kërkesat ligjore. "Strukturat drejtuese të Ministrisë së Financave, në mënyrë që të rrisin transparencën e përdorimit të këtyre fondeve, të iniciojnë inspektime financiare në institucione buxhetore, për të verifikuar ligjshmërinë dhe rregullshmërinë e përdorimit të detyrimeve të prapambetura, në mënyrë që të mos përsëriten raste të likuidimit të detyrimeve të panjohura në pasqyrat financiare të institucioneve, apo të pakontabilizuara si shpenzime të njohura", thuhet në raportin e KLSH- së.