Pas aksioneve në Greqi, rruga e re e drogës Kosova
Policia konfiskon 83 kg marijuanë në Deçan, arrestohen tre persona Marijuana vinte nga Shqipëria, drejt Gjermanisë
Aksionet e njëpasn jëshme antidrogë në Greqi kanë detyruar trafikantët shqiptarë që të gjejnë shtigje të reja për transportimin e narkotikëve. Rruga e re e marijuanës shqiptare kalon nëpërmjet Kosovës, për të vazhduar në drejtim të Serbisë, Hungarisë, me destinacion përfundimtar Austrinë apo Gjermaninë. Drejtori i Hetimit të Trafikimit të Narkotikëve, Bahri Shala ka deklaruar për mediat se aksioni i ditës së djeshme në Deçan ka vënë në pranga tre persona, dy shtetas të Kosovës dhe një të Shqipërisë, një prej tyre 35 vjeç, ndërsa dy të tjerët nga 19 vjeç. Ndërkohë, sipas tij, gjatë këtij operacioni janë sekuestruar edhe 83 kg marijuanë, e cila vinte nga Shqipëria. Droga është zbuluar në fshatin Restovicë të Deçanit. Dy automjete janë bllokuar, njëra me targa shqiptare, e cila dyshohet se është përdorur për të futur drogën në territorin e Kosovës. "Ne jemi ende në fazën e hetimeve, por në bazë të informacioneve, droga ka qenë pjesë e përgatitjes për ripaketim dhe shpërndarje në vendet e Evropës Perëndimore. Është formuar një rrugë prej Shqipërisë, nëpërmes Kosovës, në drejtim të Serbisë, Hungarisë, e pastaj drejt Austrisë apo Gjermanisë", - deklaroi në një konferencë Bahri Shala. Ndërkohë, në komunikatën e policisë thuhet se hetimet për këtë oper- acion policor kanë zgjatur prej disa muajsh dhe kanë rezultuar me arrestimin e tre personave të dyshuar për veprën penale "Blerje, posedim, shitje ose shpërndarje e paautorizuar e narko- tikëve, substancave psikotrope ose analoge". Sipas policisë, të arrestuarit janë U. K., i lindur në vitin 1971, E. K., i lindur më 1997 dhe E. A., i lindur po në vitin 1997. Gjatë kontrollit të ushtruar në një hapësirë fushore si dhe në makinën e njërit nga të dyshuarit, efektivët e policisë kanë gjetur dhe sekuestruar një sasi prej rreth 83 kg e 550 gr., substancë narkotike të llojit marijuanë. Përveç marijuanës, policia ka sekuestruar tre makina të markave të ndryshme, një me targa të Shqipërisë dhe dy me targa të Kosovës, si dhe pesë telefona celularë. Për realizimin e këtij operacioni ka ndihmuar edhe policia e Pejës. Tre të arrestuarit janë shoqëruar në ambientet e paraburgimit, ndërsa ndaj tyre është caktuar masa e sigurisë prej 48 orësh. Ndërkohë, hetimet vazhdojnë, ndërsa dyshohet se të arrestuarit kanë pasur edhe bashkëpunëtorë, që do t'i ndihmonin të kalonin drogën në Serbi fillimisht, e më pas në shtetet e tjera.