Hysi, PD- së: U bëtë pishman që e votuat? Kandidatët për gjyqtarë nuk zgjidhen me detyrim

Ligji

i vetingut ka mbërritur në Komisionin e Venecias. Burime nga Gjykata Kushtetuese konfirmuan dje, se procesi i përkthimit ka përfunduar, duke bërë të mundur dërgimin e tij drejt “Venecias” vetëm 4 ditë pasi Gjykata Kushtetuese e pezulloi ligjin. Por, deputetja socialiste, Vasilika Hysi ka sqaruar se nuk kishte pse të vonohej me përkthimin, pasi ligji ishte i përkthyer në faqen online të reformës zgjedhore. Në një status dje në “Facebook”, Hysi shkroi më pas për deputetët e PD- së: “Jeni bërë pishman që i votuat? Neni 135 & 4 i Kushtetutës, i miratuar me 140 vota dhe që të gjithë thonë ‘ jemi për reformë në drejtësi’, parashikon se: ‘ Kandidatët për gjyqtarë dhe nëpunës civilë gjyqësorë në gjykatat e posaçme, si dhe familjarët e afërm të kandidatëve, para emërimit, i nënshtrohen verifikimit të pasurisë dhe të figurës, si dhe japin pëlqimin për kontrollin periodik të llogarive të tyre bankare dhe të telekomunikimeve vetjake, sipas ligjit.’ Ky parashikim është marrë siç është në Kushtetutë dhe është përfshirë në ligjin e vetingut”, tha Hysi. “Punësimi në këto struktura bëhet me kërkesë dhe pëlqim të personit dhe jo me detyrim. Nëse pranojnë këto kushte dhe përmbushin kriteret e tjera të parashikuara në ligj, personat do të punësohen në këto struktura”, tha ajo.