Maskat grabisin grosistin e patates
Tre personat ishin të armatosur kur hynë në shtëpinë e biznesmenit në fshatin Lumalas Shahollari: Në kasafortë kisha 100 mln lekë e 60 mijë paund
Një grosist që merret me tregtimin e patates grabitet në banesë, maskat i marrin 100 milionë lekë dhe 60.000 paund. Një vjedhje spektakolare është regjistruar në orët e para të mëngjesit të kësaj të diele në fshatin Lumalas. Maskat kanë hyrë të armatosur në banesën e një personi, i cili operonte në fushën e tregtisë, dhe i kanë hapur dy kasafortat që mbante në shtëpi, ndërsa shuma e përvetësuar prej tyre ka qenë e konsiderueshme. Tre persona të maskuar kanë hyrë në banesën e 60- vjeçarit Ibrahim Shahollari, një prej tregtarëve më të njohur në fshatin Lumalas dhe përreth tij, teksa ai dhe bashkëshortja kanë qenë në gjumë, ndërsa nën kërcënimin e armëve të zjarrit i kanë bërë presion që të nxirrte dhe t'u jepte të gjitha lekët që kishte në banesë. Të zënë në befasi, 60vjeçari dhe bashkëshortja, të cilët jetojnë vetëm pasi fëmijët i kanë në emigracion, u kanë treguar atyre kasafortat ku mbanin lekët e mbledhura. Dy kasaforta, njëra në kartëmonedha shqiptare dhe tjetra në paund, janë vendosur në dispozicion të tre personave të maskuar, të cilët kanë detyruar 60vjeçarin t'i hapë ato, dhe pasi kanë marrë lekët, janë larguar menjëherë pa asnjë gjurmë. Mësohet se tre personat e maskuar nuk kanë ushtruar dhunë fizike mbi bashkëshortët, por pasi i kanë kapur në gjumë, thjesht u kanë drejtuar armën në pjesë të ndryshme të trupit dhe i kanë detyruar t'u jepnin gjithçka që kishin. Rreth orës 3: 00 të mëngjesit, ka qenë vetë i zoti i shtëpisë ai i cili ka lajmëruar policinë për t'i kërkuar ndihmë. Pasi është marrë në pyetje nga poli- cia, ai ka deklaruar se në kasafortë kishte 100 mln lekë të vjetra dhe 60.000 paund. "Ishin lekët e mbledhura nga puna e një jete dhe gjithë kursimet e fëmijëve të mi që punojnë në emigracion në Angli. Mendoja se i kisha të sigurta në shtëpi në kasafortë, por ja që tani dëmi m'u bë", - mësohet të jetë shprehur ai në polici, ndërsa nuk ka pasur asnjë të dyshuar konkret që mund të ketë pasur dijeni lidhur me këtë gjë. Policia nga ana e saj ka nisur hetimet, duke ngritur pistat e para, të cilat kanë në epiqendër gjithë të njohurit dhe personat që kishin dijeni për shumën që mbante në banesë 60- vjeçari, ndërsa nuk ka ende asnjë gjurmë konkrete që mund t'i çojë ata drejt autorëve të kësaj ngjarjeje të rëndë.