Plani urbanistik, Veliaj: Ndërtuesit do bëjnë edhe urbanizimin e lagjes

Rikualifikohet blloku i banimit në Njësinë Nr. 7

Banorëve

të Njësisë Nr. 7 në Tiranë u është shtuar edhe një tjetër bllok i rikualifikuar urban. Banorët që jetojnë përgjatë rrugës "Shefqet Musaraj" kanë tashmë jo vetëm një rrugë të re, por edhe hapësira tërësisht të sistemuara, që ofrojnë mundësi dhe standarde më të mira urbane. Kjo rrugë është hapur pas shembjes së murit që e kishte bllokuar atë, duke krijuar mundësi për lëvizjen e banorëve të kësaj zone me akses hyrje- daljeje në rrugën dytësore që lidh "Rrugën e Kavajës" me bulevardin "Gjegj Fishta". Në këtë segment janë realizuar punime për rrjetin e kanalizimeve dhe atë të ujësjellësit, si dhe në sinjalistikë. Gjatë inspektimit të punimeve, kryebashkiaku Erion Veliaj theksoi se me ndryshimet ligjore, për çdo ndërtim të ri do të jetë përgjegjësi e firmave ndërtuese për të bërë urbanizimin e lagjes dhe zonës përreth. "Nëse sot, në kushtet e emergjencës, është bashkia ajo që po rehabiliton këto territore mes pallateve, nga tani e tutje, për të gjitha lejet që do jepen me planin e ri urbanistik, kjo do të jetë detyrë e zhvilluesve; pra, të paguajnë taksën e ndërtimit dhe të rregullojnë hapësirat që preken nga zhvillimi i tyre", - tha kryebashkiaku Veliaj.