Batutat, Rama: Do fitojmë e do vij prapë. Dushaj: Nuk fiton gjë
Kryeministri viziton Tropojën, shoqërohet nga kryetari i bashkisë Kreu i qeverisë premton 60 milionë lekë për projektet
Kryeministri Edi Rama u shoqërua dje në Tropojë nga kryetari i bashkisë, përfaqësuesi i PD- së, Besnik Dushaj. Mes tyre nuk munguan edhe replikat në formë batutash. “Ajo që duhet dhe që do t’i shërbejë edhe turizmit është përmirësimi i infrastrukturës së qytetit, që, për të thënë të drejtën, bulevardi po bëhet, por mbetet fasada”, - u shpreh kryetari i Bashkisë Tropojë, Besnik Dushaj, në bisedë me kryeministrin Rama, ku e informoi atë se si fazë e dytë e projektit mbeten edhe fasadat dhe lagjet e qytetit në pjesën e sipërme, të gjitha me një vlerë 60 milionë lekë. Ndërkohë që kryeministri u përgjigj se këto projekte e kanë të hapur dritën jeshile të realizimit të tyre. “Këto janë katër kryesoret. Nga këto tani të bëjmë gjimnazin, nuk diskutohet. Këtë Unazën nuk diskutohet, fasadat nuk diskutohen, hyrjet po. Pas zgjedhjeve do vij të të takoj prapë, se ne do fitojmë”, - i tha Rama. Por, ashtu siç ka rrëfyer vetë, kreu i Bashkisë Dushaj, ai ia ka kthyer Ramës: “Jo jo, për ato mos ki frikë, se nuk fiton gjë”. Kryeministri Edi Rama u shoqërua dje në Tropojë nga deputetë e ministra për të inspektuar kantieret e Rilindjes Urbane. Investimi me vlerë rreth 150 milionë lekë është vënë në zbatim për të rilindur shëtitoren e qytetit Bajram Curri. Një sipërfaqe prej 30.000 m2 do të tjetërsohet nga një parkim me gropa e baltë, në një hapësirë urbane europiane, deri më sot të munguar për banorët e saj dhe jo vetëm. Një projekt tjetër tejet i rëndësishëm është edhe ai për rikonstruksionin e rrugës Bajram Curri – Cernicë, me gjatësi 3.7 kilometra dhe vlerë investimi 42 milionë lekë, e lënë në harresë që prej viteve ‘ 80, kur janë bërë edhe ndërhyrjet e fundit. Ky segment rrugor lidh qytetin e Bajram Currit me rrugën nacionale. Nga ky projekt përfitojnë drejtpërdrejt banorët e qytetit të Bajram Currit, ndërsa tërthorazi përfitojnë të gjithë banorët e Bashkisë Tropojë, pasi qyteti është qendra admin- istrative e bashkisë së re.
TAKIMI ME MËSUESIT
Në vijim të takimeve “Arsimi i Gjeneratës tjetër”, kryeministri Edi Rama, i shoqëruar nga ministrja e Arsimit, Lindita Nikolla, u takua në Tropojë me mësues të ciklit 9- vjeçar dhe atij të mesëm. Kryeministri diskutoi me ta mbi reformën në sistemin arsimor në Shqipëri dhe arritjet e saj, si dhe iu komunikoi drejtpërsëdrejti lajmin e rritjes së rrogave për mësuesit dhe pedagogët e të gjitha niveleve. Ministrja e Ar- simit, Lindita Nikolla shprehu mirënjohjen për të gjithë mësuesit e Tropojës, për rezultatet e kënaqshme që kanë arritur në procesin e edukimit dhe të mësimdhënies. Kryeministri, duke marrë fjalën, bëri të ditur se nga shuma e përgjithshme prej 100 milionë dollarësh e vënë në dispozicion për rritje rrogash, 18 milionë dollarë i përfiton vetëm arsimi. “Me rritjen e rrogës që do bëjmë për ju, që do të jetë mesatarisht 10 për qind, ndërkohë që të gjitha rrogat e ulëta në arsim do të rriten me 35 për qind, faktikisht ne do të kapërcejmë edhe Kosovën, edhe Serbinë, edhe Maqedoninë, edhe Malin e Zi me rrogat e ulëta, dhe do kapërcejmë Kosovën dhe Serbinë me rrogat mesatare, që do të thotë që s’është maksimumi, edhe më shumë edhe më mirë, por në këtë fazë besoj se është një sforco jo e vogël që ne duhet të bëjmë dhe do ta bëjmë. Kjo rritje është 100 milionë dollarë, që merren nga buxheti i shtetit e shkojnë në buxhetin e familjeve. 18 milionë dollarë ka vetëm arsimi”, - tha Rama. Deputetja e Tropojës e cilësoi dje, “show i radhës i Ramës në Tropojë”. “Zoti Kryeministër! Ndryshe nga ju, unë nuk jam një deputete turiste. Unë kur shkoj në Tropojë, nuk shëtis apo bëj xhiro, por shkoj të takoj banorët dhe dëgjoj hallet e tyre për punësim, shkollim, shërbim shëndetësor”, - tha deputetja.
“Nga këto, tani të bëjmë gjimnazin, nuk diskutohet. Këtë Unazën, nuk diskutohet, fasadat nuk diskutohen, hyrjet po. Mbas zgjedhjeve do vij të të takoj prapë, se ne do fitojmë.”