Maskat marrin 10 mln lekë në pikën e karburantit
Agresorët dëmtojnë serverin e kamerave të sigurisë, dyshime për bashkëpunim me operatorët Punonjësi kërcënohet me armë, autorët largohen drejt Durrësit
Një pikë karburanti në autostradën TiranëDurrës ka rënë pre e grabitjes gjatë orëve të para të mëngjesit të djeshëm. Mësohet se dy autorët e ngjarjes, ende të paidentifikuar për policinë, kanë mundur të marrin prej andej të gjithë shumën e parave që ndodhej në kasafortë, vlera e së cilës arrinte në 10 milionë lekë të vjetra. Ngjarja u shënua rreth orës 03: 12 minuta, te mbikalimi i Rinasit. Burime zyrtare të policisë së kryeqytetit bënë me dije se dy autorët ishin maskuar me çorape në kokë, ndërsa ishin të pajisur edhe me pistoletë. Agresorët kanë shkuar me një makinë para pikës së karburantit "Gulf" dhe pa dalë nga makina në të cilën ndodheshin kanë kërcënuar punonjësin. Ky i fundit është larguar menjëherë prej andej duke vrapuar, ndërsa maskat, duke përfituar edhe nga dyert e hapura që kishte biznesi në fjalë, kanë shkuar menjëherë në dhomën ku ndodhej kasaforta. Duke e dëmtuar atë me mjete të forta, autorët kanë marrë shumën e sipërpërmendur, e cila ishte xhiroja ditore e dy ditëve, si dhe zhdukën çdo gjurmë që mund të çonte policinë drejt identifikimit të tyre. Para se të largoheshin në drejtim të qytetit të Durrësit, po me mjetin e tyre, kanë thyer e dëmtuar edhe serverin e kamerave të sigurisë. "Në autostradën Tiranë- Durrës, te mbikalimi i Rinasit, dy persona ( me
çorape në kokë), janë afruar te një karburant, me një automjet, ku njëri nga dy personat dyshohet të ketë pasur armë zjarri. Punonjësi i karburantit, sapo ka parë dy personat të zbresin nga
mjeti, është larguar me vrap. Duke përdorur mjete të forta, kanë arritur të marrin kasafortën e kësaj pike karburanti, ku në bazë të dëshmive në brendësi të saj ka pasur xhiron e dy ditëve, një shumë rreth 1.000.000 lekë", thuhet në njoftimin zyrtar të policisë.
HETIMI
Burime pranë hetuesve të çështjes bënë me dije se ka dyshime se autorët mund të kenë pasur bashkëpunim me ndonjë prej punëtorëve të karburantit. Kjo për faktin se ata e dinin kohën kur në kasafortë kishte më shumë para dhe se ku ndodhej serveri i kamerave. Mësohet se pikat e karburanteve "Gulf", nuk u lënë në xhep operatorëve të tyre më shumë se 100 mijë lekë në xhep, pasi pjesa tjetër qëndron në kasafortë. Kasafortat zbrazen çdo ditë, ndërsa gjatë fundjavës paratë lihen dy ditë pa u tërhequr. Me të mbërritur në vendin e ngjarjes, policia mori në pyetje edhe punonjësin e karburantit, i cili ka thënë se nga frika është larguar prej andej sapo ka parë autorët të maskuar dhe me armë. "Mendova se ishin qytetarë që do të furnizonin makinën me karburant. Kur po shkoja drejt mjetit, njëri nga personat që ndodheshin në makinë nxori armën duke më kërcënuar. I pashë që ishin edhe të maskuar dhe jam larguar menjëherë me vrap", - ka thënë ai para oficerëve të Komisariatit Nr. 6. Një javë më parë, nisur nga situatat e krijuara në lidhje me grabitjen e pikave të karburanteve, ministri i Brendshëm, Saimir Tahiri iu ka bërë thirrje kompanive të karburanteve që të vendosin automate elektronike për pagesën, kamera me rezolucion të lartë dhe infra të kuqe, si dhe të lidhin çdo pikë karburanti me sinjal alarmi me sallën e komandimit.