Maskat grabitin nën kërcënimin e armëve një pikë karburanti
Policia shoqëron disa persona me precedent penal
KRUJE - Në orët e para të mëngjesit të djeshëm, tre persona të maskuar dhe të armatosur kanë grabitur një pikë karburanti në rrugën nacionale KrujëKrastë. Burime zyrtare nga policia lokale bënë me dije se njëri nga agresorët i armatosur me automatik dhe dy të tjerët me pistoleta, kanë qëlluar në drejtim të zyrës së pikës së karburantit. Menjëherë roja dhe një punonjës tjetër ( shitës) kanë dalë për të parë se çfarë po ndodhte, por maskat u kanë vënë armët te koka dhe i kanë detyruar që t'u japin shumën e lekëve që ata kishin gjendje ( xhiron ditore). Sipas bluve, autorët e krimit kanë marrë shumën prej 10 mijë lekësh të reja. Më pas grabitësit u kanë marrë dy punonjësve çelësat e një makine, e cila ishte e parkuar në parkingun e karburantit, dhe janë larguar me shpejtësi me automjetin tip "Audi A3", ngjyrë gri e errët, me targa AA 771 JG ( i cili dyshohet të jetë vjedhur në Tiranë). Me të marrë njoftimin, policia ka shkuar në vendngjarje dhe ka nisur hetimet për identifikimin dhe vënien në pranga të grabitësve. Mësohet se blutë kanë sekuestruar pamjet filmike të pikës së karburantit, ku shquhen tre personat e maskuar, por asnjëri prej tyre nuk është identifikuar. Persona të shumtë janë shoqëruar në polici nga kjo zonë, kryesisht të rinj, të cilët janë edhe me precedentë penalë. kl. ha.