I gjenden drogë dhe armë në banesë, prangoset i riu

DURRES - Një 24- vjeçar nga Durrësi ka përfunduar në prangat e policisë, pasi i janë gjetur dhe sekuestruar drogë, armë dhe fishekë. Bëhet fjalë për 24- vjeçarin Migel Shabani, i cili u arrestua dy ditë më parë në lagjen nr. 13, Plazh, nga forcat e sektorit të Antidrogës. Mësohet se gjatë kontrollit të ushtruar në banesën e tij, iu gjetën dhe iu sekuestruan rreth 8 kg kanabis. Po ashtu, policia gjeti edhe një armë zjarri tip pistoletë, me mbishkrimin "E- Kol", dhe 68 fishekë të kalibrit 7.62 mm. Materialet në ngarkim të tij iu përcollën Prokurorisë së Rrethit Gjyqësor Durrës, për veprime të mëtejshme për veprat penale "Prodhimi dhe mbajtja pa leje e armëve luftarake dhe e municionit" dhe "Prodhimi dhe shitja e narkotikëve".