Targeti i ri i ISIS, u japin fëmijëve lodra me tritol

Ndër shekuj, luftërat i kanë kursyer fëmijët, por ky nuk është rasti i luftëtarëve të ISIS- it, të cilët kanë vënë në shënjestër pikërisht gjeneratën e re. Në qytetin e shkatërruar nga lufta, në Mosul, një arush pellushi ose një kamion prej lodre është një thesar i rrallë për një fëmijë. Por këto "lodra të pafajshme" në dukje, në të vërtetë janë kurthe, të cilat shpërthejnë në momentin që preken. Kjo është strategjia më e re e Shtetit Islamik, të cilët aktualisht synojnë të vrasin fëmijët. Këto dhe pajisje të tjera të maskuara dhe të improvizuara me mjeshtëri janë shfaqur në një qendër trajnimi për ekspertët që studiojnë hedhjen e bombave. "Pse do të përdorte ISISi diçka të tillë, si një arush apo një lepur?" - tha kolonel Nawwad Kamil Hassan. "Ata përdorin këtë lodër, sepse e dinë se milicia peshmerga ( luftëtarët kurdë) nuk do ta prekin atë, por fëmijët po. Ata nuk janë kafshë, ata janë më keq se kafshët", - shtoi më tej ai. Njësia e kolonel Nawwad Kamil Hassan ka pastruar 50 tonë eksploziv në dy vjet nga zonat dikur të kontrolluara nga militantët, përfshirë pesë tonë nga një shkollë e vetme në qytetin Sinjar, në perëndim të Mosulit. Qyteti, rreth 250 milje në veri të Bagdadit, ka qenë nën kontrollin e ISIS- it që nga qershori 2014.