Kryeministri në Singapor: Investoni në Shqipëri, kemi model të ri ekonomik
Defekt në avionin që do udhëtonte Rama, delegacioni vjen sot
Kryeministri
Edi Rama ftoi sipërmarrësit në Singapor të investojnë në Shqipëri. Kryeministri mbylli dje vizitën në Singapor, por një defekt në avionin e linjës “Lufthansa” e ka shtyrë fluturimin drejt Shqipërisë me disa orë. Ndaj, delegacioni shqiptar nuk është nisur drejt Shqipërisë sapo ka përfunduar takimet e planifikuara. Gjatë vizitës në Singapor, kryeministri Edi Rama iu adresua Forumit Ekonomik, ku ishin të pranishëm ministri i Energjisë dhe Industrisë, Damian Gjiknuri; ministrja e Ekonomisë, Milva Ekonomi; guvernatori i Bankës së Shqipërisë, Gent Sejko si dhe një grup sipërmarrësish shqiptarë. “Ne erdhëm këtu me bindjen që barrierat gjeografike nuk mund të jenë më një justifikim. Nga ana tjetër, me bindjen se nuk ka pasur një moment më të mirë për të investuar në Shqipëri. Gjatë vitit 2016, Shqipëria u rendit e 58- a në botë në indeksin e ‘ Doing Busi- ness’, duke pasur kështu një përmirësimin rekord prej 32 vendesh në një vit”, tha Rama. “Shqipëria është në një proces tranzicioni ekonomik, duke lëvizur nga një model zhvillimi të udhëhequr nga konsumi, në një model të ri, të drejtuar nga investimet dhe eksporti. Në tri vitet e fundit, qeveria jonë ka ndërmarrë një sërë reformash të thella, duke arritur një rritje të qëndrueshme, duke nisur po ashtu procesin e reduktimit të borxhit publik. Në modelin e ri ekonomik që po ndjekim, investimet e huaja janë vendimtare për zhvillimin e qëndrueshëm të Shqipërisë, pasi ne synojmë t’i japim fund modelit të rritjes ekonomike të bazuar te rritja e borxhit, siç bënë qeveritë kaluara”, u shpreh kryeministri. Z. Rama e konsideroi Singaporin një model frymëzues në rrugën e Shqipërisë drejt zhvillimit dhe e mbylli fjalën me një thirrje, se të investosh në Shqipëri është një biznes shumë interesant dhe frytdhënës.