Kumari, tarifat që do të paguajnë bizneset
Subjektet e lojërave të fatit duhet të dorëzojnë deklaratat tatimore çdo muaj
Subjektet e lojërave të fatit duhet të dorë zojnë deklaratën tatimore çdo muaj. Shoqëritë e regjistruara në Qendrën Kombëtare të Biznesit, me objekt të ushtrimit të aktivitetit organizimin e lojërave të fatit dhe të licencuara për ushtrimin e veprimtarisë, sipas kategorisë përkatëse, në përputhje me kërkesat e ligjit nr. 155/ 2015, “Për lojërat e fatit”, deklarojnë dhe paguajnë tarifën e licencës, sipas përcaktimeve dhe afateve të vendosura me udhëzim të veçantë të ministrit të Financave, Arben Ahmetaj. Në udhëzim thuhet se tarifat e licencimit për secilën kategori lojëra fati, llogariten në këste të barabarta vjetore, përgjatë të gjithë afatit të licencimit. Ndërkohë që, deklarimi i tarifës së licencimit kryhet nga subjektet e lojërave të fatit, në përputhje me procedurat dhe modelin e deklaratës së miratuar në udhëzimin nr. 26, datë 4.9.2008, “Për taksat kombëtare”, i ndryshuar. Ky deklarim kryhet vetëm në rrugë elektronike, nëpërmjet faqes zyrtare të Drejtorisë së Përgjithshme të Tatimeve.
DEKLARATA
Subjektet e lojërave të fatit duhet të dorëzojnë de- klaratat e tyre tatimore çdo muaj, pavarësisht se detyrimi i tarifës për periudhën tatimore ( mujore) është zero dhe subjekti nuk ka për të paguar detyrime mujore për tarifën e licencës. Kësti vjetor i tarifës së licencimit paguhet brenda datës 15 janar të vitit korrent për të cilin paguhet tarifa vjetore. Deklarimi për këstin vjetor të tarifës së licencimit bëhet me deklaratën e periudhës tatimore dhjetor brenda datës 15 janar të çdo viti. Në vitin e parë të aktivitetit të lojërave të fatit, subjektet e licencuara, deklarojnë pagesën e tarifës së licencimit të barabartë me këstin vjetor, në periudhën tatimore në të cilën janë licencuar, e cila deklarohet dhe paguhet e plotë brenda datës 15 të muajit pasardhës.
TARIFAT PËR KAZINOTË
Në ligj është përcaktuar se “Bingo televizive”, për të gjithë periudhën e licencimit, ka një tarifë prej 40 000 000 lekësh dhe për “Kazino”, për të gjithë periudhën e licencimit, duke filluar nga 1 000 000 000 lekë.
REFORMA
Ligji i ri parashikon që, zhvendosja e kazinove nga qytetet në zonat turistike të shndërrohet në një atraksion plus për turistët. Kushtet dhe kriteret janë më të forta për subjektet që do të aplikojnë për marrjen e licencës për çdo kategori lojërash fati.