Bushati: E dua Vangjel Tavon, por më shumë dua SHBA dhe BE
Ministri: Ekspertiza e partnerëve, pikë për reformimin e institucioneve “Koalicioni? Jemi të hapur për çdo parti”
Një prej eksponentëve të PS, Ditmir Bushati, njëkohësisht ministër i Jashtëm nuk ka nguruar të artikulojë se më e rëndësishme për PS- në është kontrata që ka me qytetarët dhe më pas ajo me LSI- në. Bushati la një ftesë të hapur për LSI- në, nëse kjo e fundit dëshiron ta vijojë romancën në koalicionin që aktualisht ka me PS- në. Deklaratë kjo, që vjen në një moment kur bashkëqeverisja PS- LSI po luhatet në çdo ditë. “Partia Socialiste e ka shumë të qartë qëndrimin e saj. Jemi një forcë politike që jemi të përqendruar totalisht tek përmbushja e kontratës që kemi me qytetarët shqiptarë dhe natyrisht si forca më e madhe edhe e koalicionit ekzistues. Jemi të hapur për partitë që do të pranojnë programin tonë politik apo kanë vlera të përbashkëta me PS- në”, - tha ministri Bushati. Për ministrin e Jashtëm, PS mund t’i fitojë edhe e vetme zgjedhjet, sepse e cilëson si forcën politike më të madhe në vend. I pyetur nëse koalicioni PS- LSI do vijojë deri më 18 qershor, dita e zgjedhjeve parlamentare, Bushati la të kuptohej se s’mund të ketë një ndarje mes tyre përpara kësaj date, por pa ditur se cila mund të jetë e ardhmja e koalicionit pas 18 qershorit. “Nuk ka diskutim që kjo është një kontratë jo thjesht ndërmjet disa partive politike, por mbi të gjitha një kontratë, të cilën shqiptarët e kanë votuar më 23 qershor 2013 dhe nuk ka asnjë lloj diskutimi. Sot diskutimi më i rëndësishëm që duhet të jetë ka lidhje me cilësinë e reformave dhe fokusi ynë duhet të jetë në këtë pjesë, cilësia e reformave”. Vendimmarrja për vijimin apo jo të koalicionit nuk është një çështje që i përket qeverisë, por strukturave të PS. “Kjo nuk është një çështje që i përket qeverisë, por një çështje që u përket strukturave politike të PS, kryesisë të PS dhe forumeve të tjera të larta drejtuese dhe kur të vijë momenti, jam i sigurt se do kemi një diskutim shterues edhe brenda strukturave kryesore të PS. Jemi të gatshëm dhe të hapur për çdo forcë politike për të vijuar koalicionin, për ta shtuar koalicionin në kontribute dhe vlera, por mendoj se më e rëndësishme është ecuria e reformave dhe perspektiva e tyre. Një mandat i qartë edhe në
zgjedhjet e 18 qershorit është një garanci se këto reforma do të zbatohen”, - tha Bushati. Një përgjigje ka edhe për deputetin e LSI- së, Vangjel Tavo, i cili u shpreh në mediat greke se policia shqiptare mbron krimin dhe bandat. “Ne jemi të përqendruar totalisht tek puna, sepse më 18 qershor ne si qeveri, PS- ja do të japë llogari përpara qytetarëve shqiptarë përsa i përket përmbushjes së reformave dhe zotimeve të ndërmarra. E dua Vangjelin, por më shumë dua SHBA- të dhe BE dhe kur vjen
puna për vlerësimin e reformave dhe sfidave që duhet të përballojmë të gjithë së bashku, përfshirë edhe Vangjelin. Besoj se ekspertiza amerikane dhe ekspertiza e shërbimeve të KE është një pikë shumë e mirë reformimi të mëtejshëm për të gjitha institucionet shqiptare”. Deklaratën e ish- ministrit Ylli Manjani se ka informacion nga shërbimet partnere të huaja për “Eskobarin e Ballkanit”, Klement Balilin, e quajti një spekulim. “E para, nuk duhet të spekulojmë me fjalën shërbime partnere,
sepse ka shërbime të inteligjencës, policore, ligjzbatuese prandaj për mua është e vështirë, përsa kohë nuk kam arritur kurrë të kuptoj se për çfarë shërbimi i referohet deklarata në fjalë”.