Manjani: Projekti 1 mld euro, pastrim parash

Ish- ministri i Drejtësisë akuzon kryeministrin: Po pastron paratë e mbledhura nga hashashi “Me këto para synohet të fitohen zgjedhjet. FMN të mos largohet”

Ish- ministri i Drejtësisë, Ylli Manjani akuzoi dje kryeministrin Edi Rama se po pastron paratë me projektin e shpallur prej 1 miliard dollarësh. Në një status të tij në rrjetin social “Facebook”, Manjani shkroi dje: “Projekti 1 miliard euro i shpallur nga kryeministri është pastrim parash! Kultivimi dhe tregtia e hashashit i paska mbledhur 1 miliard euro, por u duhet një vend për t’i fshehur. Mënyra më e mirë është investimi. Investimi në projekte qeveritare është më i sigurti. Skema tipike e pastrimit të parave, që vijnë nga ekonomia e zezë dhe kriminale kërkon një kontratë ( shërbim, koncesion apo PPP) me qeverinë, një bankë që të jetë garante dhe një shtet të paralizuar ( për t’u mbrojtur nga ndjekja penale). Oferta në shuma të tilla u vijnë gjithmonë qeveritarëve. Njerëz të ndryshëm me ose pa kravatë shfaqen gjithmonë nëpër zyra ministrash e kryeministrash me ofertën ‘ kam para, por dua t’i investoj, mundësisht në infrastrukturë’”, u shpreh Manjani. Sipas tij, “deri më sot qeveritë tona i kanë refuzuar këto oferta sepse ishin pastrim parash. Kryeministri sot shfaqet jo si refuzues, por si ofertues dhe pranues i ofertës së vet. Kështu ndodh vetëm kur je vetë edhe në krye të parave, edhe në krye të qeverisë!”. Ish- ministri u shpreh se, “jo pa qëllim u shpall tani kjo nismë. Tani që i mbaroi misioni FMN- së, qeveria i ka duart e lira të marrë borxhe jashtë sistemit të borxhit publik. Koncesionet janë borxhe të pastra për shtetin dhe shoqërinë, por qeveria nuk i regjistron si borxh menjëherë. Tani i mblodhën paratë e gati tri viteve aktivitet informal e kriminal të kultivimit dhe tregtimit të hashashit, por edhe aktiviteteve të tjera të paligjshme. Thuajse askush nuk u dënua apo iu sekuestrua pasuria! Vetëm viktima të krimit dhe disa malësorë lazaratas janë shumë pak për të provuar suksesin imagjinar të kryeministrit në luftën kundër drogës. Drejtësia në këtë rast nuk është 100% fajtore, sepse shumë pak nga ata që u kapën i shpëtuan dënimit! Trafikantët e vërtetë vetëm u pasuruan dhe tani janë gati të investojnë”, komentoi Manjani. Sipas tij, “sulmi me qëllim bllokimin e Prokurorisë synon në thelb të garantojë siguri për investitorët ‘ trafikantë’, që nuk do ketë hetime kur paratë të fillojnë të dalin në sipërfaqe! “Jo pa qëllim u shpall tani kjo nismë. Tani që i mbaroi misioni FMN- së, qeveria i ka duart e lira të marrë borxhe jashtë sistemit të borxhit publik. Koncesionet janë borxhe të pastra për shtetin dhe shoqërinë, por qeveria nuk i regjistron si borxh menjëherë”, tha Manjani.

Tani duhet një projekt i tillë edhe për ‘ t’u gjetur punë’, bankave që prej vitesh tashmë rropaten për të mbyllur bilancet e tyre vjetore pozitivisht. Sigurisht, tani në prag të zgjedhjeve duhet ky projekt, i cili përdoret për qëllime populiste për të fituar zgjedhjet”. Manjani propozon si zgjidhje moslargimin e FMN- së. “Çështja është se me këtë mënyrë edhe të tjerë përpara i kanë fituar zgjedhjet. Me skemat piramidale u fituan zgjedhjet e 1996, por vetëm një vit më pas ndodhi hataja. Shqiptarët nuk mund t’i lajnë borxhet trafikantëve njësoj si kreditorëve seriozë të derisotëm! Si fillim nuk duhet të largohet FMN...”, tha ai.