Basha me biznesin: Rrisim pagën minimale dhe pensionet
Ekspertët gjermanë: Programi i PD- së, realist, i besueshëm dhe i zbatueshëm "Ulim taksat, ndërtojmë portin më të madh në Ballkan"
Kreu i PD- së, Lulzim Basha, prezantoi dje p r o g r a m i n ekonomik të së djathtës përmes të cilit premton se do të luftojë korrupsionin dhe do bëjë investime transparente. Programin e ri qeverisës të PD- së, z. Basha e shpalosi gjatë një takimi me biznesin, sindikatat dhe ekspertët e CDU gjermane, të cilët ndihmuan në hartimin e tij. Walter Glos, Drejtor Ekzekutiv i Fondacionit Konrad Adenauer, Mathias Schafer, Drejtor i Politikane ne fondacionin Konrad Adenauer dhe Mathias Hubcher, drejtori i Departamentit për Programin ne CDU, të pranishëm dje në takimin me biznesin gjerman, u shprehën se programi i z. Basha ka prioritetet e duhura dhe jep zgjidhjet e duhura për ekonominë. Ata theksuan se në program përfaqësohet mundësia e sipërmarrësit dhe e qytetarit. Programi, lejon menaxhimin e buxhetit për ta bërë më të aksesueshëm, më transparent. Ekspertët gjermanë u shprehën se një shtet i fuqishëm nuk është ai që përfshihet kudo dhe shpenzon shume para, por ai shtet që mban kuadër të besueshëm ligjor dhe mban premtimet. Nga ana e tij z. Basha premton lehtësi për familjet në nevojë si dhe mbështetje për bizneset, infrastrukturën dhe transparencën e qeverisjes. Kreu i PD- së rreshtoi disa lajme të mira nëse do të votohet kryeministër. Do të niste punën duke firmosur menjëherë dyfishimin e pagesës së ndihmës ekonomike. Paga minimale në vend të shkojë në 32 mijë lekë dhe nga ana tjetër 32 mijë lekët e para të çdo page, do përjashtohen nga tatimi. Për pensionistët premtohet rritjes së pensionit minimal me 33% brenda mandatit të parë dhe ulje e moshës së daljes në pension. Në gjithë këtë skemë për familjen premtohet dhe ulja e kostos për energjinë, tvsh e saj do të ulet me 5 %, çka për demokratët do ulë dhe çmimin e energjisë, do të ketë falje të kamatëvonesave dhe pagesë nga shteti të 200 kilovatëve të para të shpenzuara. Sidoqoftë rimëkëmbja ekonomike, shprehet z. Basha ka si kategori të parë për mbështetje rininë. Qeverisja e vogël është zotimi, si dhe ulja e barrës fiskale, premtuar prej një viti. Ajo parashikon taksën e sheshtë 9 për qind, zerimin e tatimit mbi dividendin, tvsh vetëm me një shkallë tatimore 15%. Biznesi i vogël; do të tatohet me një kuotë fikse, 1,5% të xhiros, tha Basha ndërkohë para biznesit gjerman në tryezë, theksoi si themelore transparencën e qeverisjes. "Çdo punëdhënës, që punëson individë nga kategoria e familjeve me ndihmë ekonomike do të subvencionohet me gjysmën e kontributit të punë dhënësit për sigurimet shoqërore. Ne parashikojmë që deri në fund të mandatit të parë qeverisës të rrisim minimalisht 33% pensionin minimal dhe të ulim moshën e daljes në pension", theksoi z. Basha. Në programin qeverisës, Partia Demokratike synon rritjen e ndihmës ekonomike, ndërsa premton një paketë të plotë sociale për familjet në nevojë. "200 kv e parë të energjisë elektrike do të paguhen si pjesë e paketës së ndihmës sociale, po ashtu fatura e ujit dhe librat e fëmijëve. Një nga vendimet e para të qeverisë time do të jetë rritja e ndihmës ekonomike dhe shpërndarja në çdo familje", theksoi kreu i PD- së. Z. Basha premtoi dhënien fund të kontratave monopoliste dhe rishikim të koncensioneve, ndërsa krah investimeve ambicioze në infrastrukturë foli për ndërtimin e një porti të madh, strategjik për gjithë Ballkanin. "Ndërtimi më në fund të një porti të thellë me kapacitete të mëdha për t'i dhënë Shqipërisë të jetë një magazinë për Ballkanin dhe më gjerë", u shpreh z. Lulzim Basha. I zhgënjyer nga gjithë qeveritë e mëparshme, biznesi i kërkoi kryetarit të Partisë Demokratike firmosjen e një kontrate garancie që të mos ndryshojnë premtimet dhe paketa fiskale. Partia Demokratike në platformën qeverisëse parashikon uljen e TVSH për energjinë 5%, taksë e sheshtë 9%, tatim mbi vlerën e shtuar në masën 15% dhe taksë fikse për biznesin e vogël, 1.5% të xhiros.