Skënderbeu, tre gola për të vënë Kukësin në presion
Në derbin e mbijetesës në Vlorë, Tarik Cmajcanin shënon një gol tre pikësh për Teutën Muzaka, Latifi dhe Radas thyejnë Luftëtarin
Skënderbeu ndëshkon Luftëtarin me tre gola të shkëlqyer ndërsa gjirokastritët largohen nga Korça me një rezultat të gënjeshtërt për atë çka dhanë në fushë. Muzaka, Latifi dhe Radas ishin autorët e golave, ndërsa në minutën e 35- të, gjirokastritët i shkuan fare pranë golit me një rast që u shndërrua në diskutim për moviolë. Daja dhe Milinkoviç kishin hedhur formacionet më të mira të mundshme dhe loja është e bukur, ka ritëm dhe shpejtësi. Në minutën e 6- të Hamdi Salihi i shkon fare pranë golit të epërsisë, por devijimi i tij në fluturim e sipër del ngjitur me shtyllën e Ruçit. Në minutën e 25- të kampionët gjejnë golin e avantazhit pas disa kombinimeve mjaft të bukura me Salihin që fton Muzakën në gjuajtje dhe mesfushori nuk fal duke çelur rezultatin. Në minutën e 35- të vjen dhe momenti më kritik i ndeshjes. Mutumane kërcen mirë në zonë dhe me kokë gjuan saktë, por topi i tij pasi prek shtyllën ecën sipër vijës fatale dhe më pas gjen këmbët e Shehit, ndërsa gjirokastritët pretendojnë se topi kishte hyrë në portë, por kryesori Xhaja vijon lojën. Dhe menjëherë Shehi nis aksionin e golit të dytë, ndërsa Liridon Latifi do të krijojë hapësirën e duhur dhe me të djathtën mposht Ruçin, që duket se nuk e sheh topin të niset, duke reaguar disi me vonesë. Si për të vulosur ditën jo të Luftëtarit, Dejvi Bregu lë fushën i dëmtuar në minutën e 45të. Pjesa e parë mbyllet me rezultatin 2- 0 për Skënderbeun, ndërsa korçarët qëndrojnë të tërhequr, teksa ia lënë fjalën e parë miqve, të cilët e kishin të vështirë të shënonin, ndonëse provuan në disa momente. Për t'i vënë kapak ndeshjes mendoi kroati Marko Radas me një eurogol në minutën e 75- të, teksa mposhti Ruçin nga një distancë e largët.
Pas kësaj fitoreje, Skënderbeu shkon në - 1 pikë nga Kukësi, duke bërë që presioni të kalon të kryesuesit, të cilët luajnë të hënë në Laç ndeshjen e tyre.
Goli i Tarik Cmajcanin thyen Flamurtarin në kohën shtesë, duke bërë që Teuta të marrë një fitore jetike në luftën e saj për mbijetesë, ndërsa nga ana tjetër, Shpëtim Duro e nis me humbje aventurën e tij në krye të stolit vlonjat, teksa do t'i duhet shumë punë për ta shpëtuar Flamurtarin nga rënia nga kategoria.
Nis më mirë për vlonjatët në stadiumin Flamurtari, ndërsa fillimisht provon Bruno Alvesh në minutën e 5- të, por gjuajtja e tij me kokë del jashtë. Flamurtari vijon të këmbëngulë, ndërsa në të 35- ën është Galiç që shkarkon një predhë të pakapshme për Moçkën, por fatmirësisht për gardianin e durrsakëve, ai top del jashtë. Mbyllet me rrjeta të paprekura pjesa e parë, ndërsa edhe në të dytën vijon këmbëngulja e Flamurtarit, por në minutën e 48- të Moçka në dy kohë do të ndalë aksion-
in e rrezikshëm të vlonjatëve, ndërsa në minutën e 69- të Hyseni është i pafat kur sheh gjuajtjen e tij të ndalet nga traversa e Moçkës. Skuadrat luajnë ashpër me njëra- tjetrën, ndërsa me kalimin e minutave krijohet ideja se takimi do të mbyllet në barazim, pavarësisht këmbënguljes së Flamurtarit, por një top i hedhur në zonë nga e djathta, ndiqet mirë nga Cmajcanin që gjuan fluturimthi duke mposhtur Halilajn dhe duke vulosur fitoren e miqve, që shkojnë në 23 pikë në tabelë, 3 më shumë sesa Laçi dhe Flamurtari, duke siguruar një sukses vërtet jetik në luftën për mbijetesë.