Edi Rama: PD kërkon të rikthejë ' 97
Kryeministri takon ambasadorët, i përgjigjet LSI: Raporti i DASH, provë se kemi luftuar kundër kanabisit "Një gjë është e sigurt, zgjedhjet do të bëhen në18 qershor"
Kryeministri Edi Rama iu përgjigj dje, kritikave që erdhën nga aleati PS- së, LSI pas raportit të Departamentit Amerikan të Shtetit. Në një fjali, ai e përmblodhi kështu raportin e DASH: "Raporti i Departamentit të Shtetit provon sa shumë është bërë në luftën kundër kanabisit. Shumë mbetet për t'u bërë dhe do të bëhet se s'bën", shkroi dje, Rama. Ndërkohë më herët Kryeministri pati një takim me ambasadorë të akredituar në Tiranë. Në takimin e zhvilluar në "Vilën 30", përballë zyrave të kryeparlamentarit Ilir Meta, nuk ishte e pranishme ambasadorja e BE- së, Romana Vlahutin. Kryeministri Edi Rama dhe ministri i Jashtëm Ditmir Bushati, mësohet se janë njohur me pikëpamjet e diplomatëve të huaj për gjetjen e një kompromisi mes palëve në një kohë që opozita vijon prej një muaji protestën e ngritur në çadrën përpara Kryeministrisë dhe po këmbëngul në kërkesën për qeveri teknike, madje së fundi edhe për shtyrjen e zgjedhjeve të 18 qershorit. "TCH" citon se "ambasadori Lu ka këmbëngulur për vijimin e dialogut mes palëve dhe sidomos miratimin e institucioneve të vetingut me rikthimin e opozitës në parlament. Vetingu mbetet kushti kryesor nga BE- ja për hapjen e negociatave të anëtarësimit në Bashkimit Europian". Në përfundim të takimit me ambasadorët, kryeministri Edi Rama nuk dha asnjë deklaratë, ndërsa vetëm ambasadori italian Kutilio konfirmoi faktin që situata politike ishte në qendër të bashkëbisedimit dhe mesazhet për qeverinë dhe opozitën mbeten po ato të ministrit të Jashtëm italian, Angelino Alfano.
TAKIMI NË SHKODËR
Pas këtij takimi, Rama ishte dje, pasdite në Shkodër, ku u ndanë leje të reja legalizimesh. Në fjalën që mbajti atje, Rama akuzoi PD- në se
kërkon të rikthejë ' 97- ën në Shqipëri. "Ju e dini që nuk është se e morëm shtetin shtet, e morëm shtetin çadër. E tani ata janë futur aty që ta bëjnë çadër prapë. E janë po ata që ( se jemi në mars të 2017) - aty brenda keni po ata që në mars të 1997, e kujtoni mirë se çfarë i bënë shtetit. Se ata, vetëm atë dinë të bëjnë. Po s'e patën ata, kërkojnë duke i vënë zjarrin, po e morën ata, çmontojnë pa i qarë hallin", u shpreh Rama. Gjatë fjalës së tij, duke folur për kërkesat e opozitës për zgjedhjet, Rama tha: "Një gjë është e sigurt, zgjedhjet do të bëhen më 18 qershor. Gjykoni me qetësi dhe në fund vendoseni nëse doni me ik nga shtëpia që sapo u bëtë pronarë me u fut në çadër dhe ju apo doni që së bashku të vazhdojmë rrugën që kemi nisur". Për sa kohë ata që na votuan men- dojnë se unë dhe ne duhet t'ju shërbejmë juve, nuk ka forcë që e ndryshon këtë vullnet", tha më tej Rama. "Në 8 vjet nuk ishte bërë asnjë legalizim, zero. Të gjithë ata që kanë sot shtëpinë e legalizuar janë dëshmitarët më të mirë të së vërtetës që ky është një proces që mund ta bënim vetëm ne dhe ky është një proces që mund ta përfundojmë për të gjithë vetëm ne", u shpreh më tej, Rama. Kreu i ekzekutivit garantoi përfundimin e dy projekteve ku po punohet aktualisht, të rrugës ShkodërVelipojë dhe atë të Thethit, të cilat veçoi Rama, u premtuan nga të tjerë njerëz dhe po realizohen nga qeveria e majtë. "Shkodra me Voltanën në gjumë të thellë si Tirana me Lulin", u shpreh kryeministri.